2023 جىلى جانە 2024 جىلدىڭ ءبىرىنشى توقسانىندا اتاۋلى الەۋمەتتىك كومەك العان 58 445 وتباسى مەملەكەتتىك قولداۋ شارالارىنىڭ ارقاسىندا كەدەيلىك جاعدايىنان شىعىپ وتىر.
2023 جىلى جالپى سوماسى 59،4 ملرد تەڭگەگە 114،1 مىڭ وتباسى (598،4 مىڭ ادام)، 2024 جىلدىڭ ءۇش ايىندا 7،8 ملرد تەڭگەگە 58،8 مىڭ وتباسى (312 مىڭ ادام) ااك الدى، دەپ حابارلايدى Almaty-akshamy.kz ق ر ەڭبەك جانە الەۋمەتتىك قورعاۋ مينيسترلىگىنە سىلتەمە جاساپ.
وتكەن جىلدىڭ قورىتىندىسى بويىنشا وڭىرلىك بولىنىستە ااك الۋشىلاردىڭ ەڭ كوپ سانى تۇركىستان وبلىسىندا – 27 مىڭ وتباسى (23،7%)، شىمكەنت قالاسىندا – 12،7 مىڭ وتباسى (11،2%)، الماتى – 9،5 مىڭ وتباسى (8،3%)، قىزىلوردا وبلىستارىندا – 9،4 مىڭ وتباسى (8،2%).
ااك الۋشىلاردىڭ ەڭ از سانى ۇلىتاۋ – 538 وتباسى (0،5%)، اتىراۋ – 1،1 مىڭ وتباسى (0،9%)، سولتۇستىك قازاقستان وبلىستارىندا – 1،6 مىڭ وتباسى (1،4%) بايقالىپ وتىر.
ااك الۋشىلاردىڭ قۇرىلىمىندا باسىم كوپشىلىگى بالالاردىڭ ۇلەسىنە كەلەدى – 65،4% نەمەسە 391،2 مىڭ ادام، جۇمىس ىستەيتىن ازاماتتار – 15،1% نەمەسە 90،6 مىڭ ادام؛ بالالاردى، قارتتاردى جانە مۇگەدەكتىگى بار ادامداردى كۇتەتىن ادامدار – 12،4% نەمەسە 74،2 مىڭ ادام؛ قالعان 7،1%-ى ازاماتتاردىڭ باسقا ساناتتارىنا جاتادى.
ااك-نىڭ نەگىزگى ماقساتى – اقشالاي تولەمدەر تۇرىندەگى قولداۋدى جۇزەگە اسىرۋ جانە وتباسىنىڭ ەڭبەككە قابىلەتتى مۇشەلەرىن جۇمىسپەن قامتۋعا جاردەمدەسۋدىڭ بەلسەندى شارالارىنا تارتۋ ارقىلى وتباسىن قيىن ومىرلىك جاعدايدان شىعارۋ.
ااك كەلەسىلەردى كوزدەيدى:
- تابىسى وڭىرلىك ەڭ تومەن كۇنكورىس دەڭگەيىنىڭ 70%-نان اسپايتىن ازاماتتارعا توقسان سايىن الەۋمەتتىك كومەك تاعايىنداۋ؛
- 1 جاستان 6 جاسقا دەيىنگى تابىسى از وتباسىلارداعى ءار بالاعا 1،5 اەك مولشەرىندە اي سايىنعى قوسىمشا تولەم بەرۋ.
- جۇمىسقا ورنالاستىرۋ جولىمەن جۇمىسپەن قامتۋعا جاردەمدەسۋ، وقۋعا جىبەرۋ، ءوز ءىسىن اشۋعا ىنتالانعان وتباسىلارعا گرانتتار بەرۋ جانە ت.ب.
مىسالى، اقتوبە وبلىسىندا كوپبالالى وتباسى مەملەكەتتىك قولداۋ شارالارى اياسىندا 2023 جىلدىڭ قىركۇيەگىندە 400 اەك نەمەسە 1 ملن 380 مىڭ تەڭگە كولەمىندە قايتارىمسىز گرانت الىپ، شاعىن ناۋبايحانا اشتى.
«ءبىز كۇيەۋىم ەكەۋمىز 6 بالا تاربيەلەپ وتىرمىز، جۇبايىم «قازپوشتا» اق-دا جۇمىس ىستەيدى. ءبىز 2018-2019، سونداي-اق 2022-2023 جىلدارى ااك الۋشى بولدىق. 2023 جىلى قايتارىمسىز گرانت العاننان كەيىن مەن جەكە كاسىپكەر رەتىندە تىركەلدىم. سونداي-اق، 2 ادامدى تۇراقتى جۇمىسپەن قامتىپ وتىرمىز»، – دەدى اقتوبە وبلىسى شالقار قالاسىنىڭ تۇرعىنى جانارگۇل ناعيمەتوۆا.
قوستاناي وبلىسىنىڭ تۇرعىنى كريستينا روگوجنيكوۆا دا قايتارىمسىز گرانت الىپ، ءوز كاسىبىن باستادى. ول وتباسىمەن بىرگە 2021 جىلدان 2023 جىلعا دەيىن ااك الىپ كەلگەن.
«مەن مانيكيۋر سالاسىنا كەلۋدى كوپتەن بەرى ويلاستىرىپ ءجۇردىم، سەبەبى ءوزىمدى ءدال وسى باعىتتا سىناپ كورگىم كەلدى. مانساپ ورتالىعىندا ماعان كەڭەس بەرىلدى، سودان كەيىن «باستاۋ بيزنەس» باعدارلاماسى بويىنشا وقۋدان ءوتتىم. ءارى قاراي مەن 1 ملن 380 تەڭگە كولەمىندە گرانت الىپ، كابينەت اشىپ، جۇمىس باستاپ كەتتىم»، – دەدى كاسىپكەر كەلىنشەك.