قازاقستاندىق ماماندار ChatGPTء-دىڭ بالاماسىن جاسايدى، دەپ حابارلايدى Almaty-akshamy.kz.
«ChatGPT قازاق تىلىندە جۇمىس ىستەي الادى. ءبىراق ول قازاق تىلىندە سويلەپ، سۇراقتارعا ەركىن جاۋاپ بەرۋ ءۇشىن شامامەن 13 ملرد توكەن كەرەك. بۇگىندە وندا 1،5 (ملرد توكەن) بار، بۇل 10 ەسە از. ءقازىر الدىمىزدا كىتاپحانالار، شىعارمالار مەن قازاقستاندىق مەنتاليتەتتى ەسكەرىپ، وتاندىق مودەلدى ازىرلەۋ مىندەتى تۇر. جىلدىڭ سوڭىنا دەيىن قازاقشا مودەلدى ازىرلەپ، قوعامعا ۇسىنىلادى»، - دەدى "سيفرلىق ۇكىمەتتى قولداۋ ورتالىعى" باس ديرەكتورى رۇستەم بيعاري.
رۇستەم بيعاري ChatGPTء-دىڭ بالاماسىن ىسكە قوسۋ ءۇشىن سۋپەركومپيۋتەر كەرەگىن اتاپ ءوتتى.
«بۇگىندە نازاربايەۆ ۋنيۆەرسيتەتىنىڭ بازاسىندا 2 سۋپەركومپيۋتەر بار. بۇل قاجەتتى نورمادان 10-15 ەسە از. پرەزيدەنت قاسىم-جومارت تاپسىرما بەرىپ، سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى سۋپەركومپيۋتەرلەردى ساتىپ الىپ، ونى ىسكە قوسۋعا كىرىستى. بۇل عالىمدارعا قازاقستاندىق لينگۆيستيكالىق مودەلدى ازىرلەۋگە مۇمكىندىك بەرەدى»، - دەدى ول.
باس ديرەكتور بۇگىندە جوباعا كاسىپكەرلەر قىزىعۋشىلىق تانىتىپ وتىرعانىن ايتتى.
«قاڭتاردا مەملەكەت باسشىسى قازاقستاندىق ۇلگىنى جاساۋ تۋرالى ايتقاندا 2-3 شەشىم بولسا، ءقازىر ولاردىڭ سانى ءوسىپ جاتىر. جوباعا بيزنەس قىزىعۋشىلىعى ارتتى. ءبىزدى بۇل قۋانتادى. ءوز تاراپىمىزدان دەرەكتەر جانە ەسەپتەۋ قۋاتىمەن قامتاماسىز ەتەمىز»، - دەدى رۇستەم بيعاري.