د.قونايەۆتىڭ 111 جىلدىعى اتالىپ ءوتتى.
مەگاپوليستە مەملەكەت جانە قوعام قايراتكەرى، ءۇش مارتە سوسياليستىك ەڭبەك ەرى، ديپلومات، اكادەميك دىنمۇحامەد احمەت ۇلى قونايەۆتىڭ ەسكەرتكىشىنە گۇل شوقتارىن قويۋ ءراسىمى ءوتتى. سونداي-اق، د.ا.قونايەۆتىڭ مەموريالدى پاتەر-مۋزەيىندە ەكسكۋرسيا ۇيىمداستىرىلدى. زيالى قاۋىم وكىلدەرى مەملەكەت جانە قوعام قايراتكەرىنىڭ ءومىرى مەن مەملەكەتتىك قىزمەتى، ونىڭ ەلىمىزدىڭ الەۋمەتتىك-ەكونوميكالىق، عىلىمي الەۋەتىن دامىتۋعا قوسقان ۇلەسى، كەيبىر ساياسي جانە قۇقىقتىق كوزقاراستارى، ساياسي تالانتى تۋرالى ەستەلىكتەرىمەن ءبولىستى.
«مەن د.ا.قونايەۆپەن بىرگە جۇمىس جاساعان باقىتتى ادامداردىڭ ءبىرىمىن. زەينەتكە شىققان كەزىندە اعامىزبەن ەتەنە ارالاستىم. ول كىسىنىڭ ادامگەرشىلىگى مەن ەڭبەكقورلىعىنا قاراپ قاي كەزدە بولسىن تامساناتىن ەدىك. زەينەت جاسىنا شىقسا دا، ەلىنە ەڭبەك ەتىپ، بولاشاق ۇرپاققا وشپەس ءىز قالدىرعان بولاتىن. ول كىسىنىڭ جارقىن بەينەسى، قاجىماس قايراتى ۇرپاق جادىندا ماڭگى ساقتالارىنا سەنىمدىمىز. بۇگىن مىنە جاستار دا ءىس-شاراعا قاتىسىپ، وزدەرىنىڭ جۇرەكجاردى تىلەكتەرىن ارناۋدا. د.ا.قونايەۆ ەل ءۇشىن ولشەۋسىز ەڭبەك ەتكەن ەرەن تۇلعا دەسەك، ارتىق ايتپاعانىمىز بولار»، – دەيدى قازاقستان جۋرناليستيكا اكادەمياسىنىڭ ۆيسە-پرەزيدەنتى ۆالەريي جانداۋلەتوۆ.
مەملەكەت قايراتكەرىنىڭ 111 جىلدىعىنا ارنالعان ءىس-شارانىڭ ماقساتى – ونىڭ ەل ەكونوميكاسى مەن ساياسي ارەناداعى ءرولىن ۇرپاقتان-ۇرپاققا ناسيحاتتاۋ جانە دارىپتەۋ. ونىڭ ءومىرى مەن كوپ قىرلى قىزمەتى قازاقستاننىڭ ۇلى ءداۋىرىنىڭ سيمۆولىنا اينالدى.
«ءبىز جاس بولساق تا، د.ا.قونايەۆتىڭ ۇلتىنا جاساعان قىزمەتىنەن حابارىمىز بار. بۇگىن گرۋپپالاستارىممەن بىرگە گۇل شوقتارىن قويىپ، رۋحىنا تاعزىم ەتىپ، ءمۇراجاي-ۇيىن ارالاپ شىقتىق. بىزگە وتە قاتتى ۇنادى. اتامىزدىڭ وقىعان كىتاپتارىن، دەمالعان ورىندىعىن، اسحاناسىن كورىپ قايتتىق. بىرگە 30 جىلداي قىزمەتتەس بولعان ادامداردىڭ اڭگىمەلەرىن ەستىپ، ءبىز دە جادىراپ قالدىق. بولاشاقتا اتامىز سەكىلدى ەلگە ەڭبەگى سىڭگەن ازامات بولساق دەگەن ارمانىم بار»، – دەيدى ق ر ۇلتتىق قاۋىپسىزدىك كوميتەتىنىڭ شەكارا اكادەمياسىنىڭ 4 كۋرس كۋرسانتى، سەرجانت ادىلبەك قاپاروۆ.
قونايەۆتىڭ شىنايى تۇلعاسىن اشۋعا، ياعني ونى قاراپايىم تۇلعا رەتىندە كورسەتۋگە مۇراجاي ءۇيى ۇلكەن مۇمكىندىك بەرەدى. بۇل ورىن قونايەۆتى تەك مەملەكەت قايراتكەرى رەتىندە عانا ەمەس، شىنايى ومىردە بولعان تۇلعا رەتىندە دە اشىپ كورسەتتى دەسەك، ارتىق ايتپاعانىمىز بولار.
«مۇندا ساقتالعان جادىگەرلەر دىنمۇحامەد احمەت ۇلىنىڭ دۇنيە-مۇلىككە قىزىقپايتىن قاراپايىم ادام بولعانىن، ونىڭ قاراپايىم تىرشىلىگىن، قالاي دەم الىپ، نەندەي دۇنيەگە قىزىعۋشىلىق بىلدىرەتىنىن اڭعارتادى. مۇراجاي بۇل وتكەن تاريحىمىزبەن تانىستىراتىن ورىن ءارى ونەگەلى ءومىردىڭ ناعىز كۋاگەرى»، – دەيدى مۇراجاي مەڭگەرۋشىسى ەلەنا كۋباشيەۆا.
اتالمىش ءىس-شاراعا د.ا.قونايەۆتىڭ قىزمەتتەس ءىزباسارلارى، مەملەكەت جانە قوعام قايراتكەرلەرى، سوعىس جانە ەڭبەك ارداگەرلەرى، تۋعان-تۋىستارى، ب ا ق وكىلدەرى، قالا تۇرعىندارى مەن قوناقتارى قاتىستى