«ۇلى ابىلاي حان – تاڭداۋلى دەرەكتەر ءۇزىندىسى» قويىلىمى ساحنالاندى
ۇلى تۇلعالار ەسىمى ۇمىت بولماۋى ءتيىس. ۇرپاعى ۇنەمى ەسكە الىپ وتىرعانى ابزال. حالقىمىز «ءارۋاق رازى بولماي، ءتىرى بايىمايدى» دەيدى. وسى ورايدا الماتىدا «ترانسفورما» شىعارماشىلىق جاستاردىڭ كوپسالالى مادەني كەڭىستىك الاڭىندا قازاقتىڭ ۇلى بيلەۋشىسى ابىلاي حاننىڭ ومىرىنە بايلانىستى ساحنادا قويىلىمى قويىلدى.
بابالار ەسىمىن ۇلىقتاعان قويىلىم الماتى قالاسى قوعامدىق دامۋ باسقارماسىنىڭ قوعامدىق دامۋ ورتالىعىنىڭ ۇيىمداستىرۋمەن ءوتتى. ءىس-شارا ەگەمەندىكتىڭ نىشانى رەسپۋبليكا كۇنى قارساڭىندا ۇيىمداستىرىلدى.
ۇلى ابىلاي حان ەسىمى ءبارىمىز ۇلگى الاتىنداي ساياسي تۇلعا. قازاق حاندىعىنىڭ توقىراۋ جىلدارىندا ەل تىزگىنىن قولعا العان ول مەملەكەتتىلىكتى نىعايتتى. باتىل سىرتقى ساياساتتى جۇزەگە اسىرىپ، ەل بىرلىگىن ساقتاۋعا بار كۇش-جىگەرىن سالدى. ساياساتكەردىڭ ديپلوماتيالىق قابىلەتى ەلدىڭ سولتۇستىگىندەگى الىپ ەل پاتشالىق رەسەي مەن شىعىستاعى سين ەلىمەن تەرەزەسى تەڭ ساياسات جۇرگىزۋگە مۇمكىندىك بەردى.
ول كەزەڭدە قازاق حاندىعىنىڭ ىشكى ساياسي جاعدايى دا ءماز ەمەس ەدى. ءبىر ورتالىققا باعىنۋ سياقتى قۇندىلىق جوعالا باستاعان. ءار سۇلتان باس-باسىنا بي بولعان زامان. سونداي قيلى زاماندا ەل تىزگىنىن ۇستاعان تۇلعا ەسىمى اسىرەسە جاستار اراسىندا دارىپتەلۋى ءتيىس. بۇل تۇرعىدان الار بولساق ءىس-شارانىڭ ءوز ماقساتىنا جەتكەنىنە كوزىمىز جەتتى. سەبەبى، قويىلىمدى كورۋگە كەلگەن جاستاردىڭ سانى كوپ، ءتىپتى ورىن جەتپەي تۇرەگەپ تۇرىپ قاراۋعا تۋرا كەلدى. قويىلىمدى تاماشالاۋعا كەلگەن جاستار رۋحاني ازىق الدى.
قويىلىم قۇرمانعازى اتىنداعى قازاق ۇلتتىق كونسەرۆاتورياسى، تەمىربەك جۇرگەنوۆ اتىنداعى قازاق ۇلتتىق ونەر اكادەمياسى، جۇسىپبەك ەلەبەكوۆ اتىنداعى رەسپۋبليكالىق ەسترادالىق-سيرك كوللەدجى سياقتى قالامىزداعى شىعارماشىلىق وقۋ ورىندارىنىڭ ستۋدەنتتەرىنىڭ قاتىسۋىمەن ساحنالاندى.