ەلىمىزدە ازىرلەنگەن جاڭا مودەل مەكتەپتە تاماقتانۋ مادەنيەتىن قالىپتاستىرۋدىڭ كەزەڭدىك ءىس-شارالار كەشەنىن قامتيدى.
پيلوتتىق جوبا استانا قالاسىنىڭ التى مەكتەبىندە جۇزەگە اسىرىلۋدا. اتالعان مودەل وقۋ-اعارتۋ مينيسترلىگىنىڭ باستاماسىمەن ۇلتتىق سالاۋاتتى تاماقتانۋ ورتالىعىمەن بىرلەسىپ قۇرىلدى، دەپ حابارلايدى Almaty-akshamy.kz.
ءبىرىنشى كەزەڭدە مەكتەپتەگى تاماقتانۋدى ۇيىمداستىرۋدى باعالاۋ جانە تالداۋ ماقساتىندا بالالاردىڭ مەكتەپ اسحاناسىنداعى مىنەز-قۇلقىنىڭ ۇلگىلەرىن بايقاپ زەرتتەۋ، انتروپومەتريالىق كورسەتكىشتەردى ولشەۋ (بويى، سالماعى) جانە دۇرىس تاماقتانۋ قاعيداتتارىن بىلۋگە ساۋالناما جۇرگىزىلەدى.
ەكىنشىسىندە - سالاۋاتتى ءومىر سالتى سالاسىنداعى ءبىلىم مەن تاجىريبەنى بايىتۋ ءۇشىن جەتكىزۋشىلەردى، مەكتەپ پەرسونالىن، وقۋشىلاردى جانە ولاردىڭ اتا-انالارىن وقىتۋ ۇيىمداستىرىلادى.
ءۇشىنشى كەزەڭ بالالاردىڭ دۇرىس تاماقتانۋىنا جانە فيزيولوگيالىق قاجەتتىلىكتەرىن ەسەپكە الۋعا باسا نازار اۋدارا وتىرىپ، وقۋشىلاردىڭ تاماقتانۋىن رەتتەيتىن نورماتيۆتىك-قۇقىقتىق قۇجاتتاردى ۇيلەستىرۋدى بىلدىرەدى.
ءتورتىنشى كەزەڭدە بالالاردىڭ دەنساۋلىعىن ساقتاۋعا باعىتتالعان مەكتەپتە تاماقتانۋدىڭ جاڭا مودەلىن ازىرلەۋ كوزدەلىپ وتىر. بۇل ۇدەرىس دەنساۋلىقتى ساقتاۋعا ىقپال ەتەتىن ءبىلىم بەرۋ ورتاسىن قالىپتاستىرۋ ماقساتىندا ۇيلەستىرىلگەن ءتاسىلدى قامتاماسىز ەتپەك.
سوڭعى كەزەڭ - ەنگىزىلگەن وزگەرىستەردىڭ مونيتورينگى جانە تيىمدىلىگىن باعالاۋ.
ايتا كەتەيىك، بۇعان دەيىن مينيسترلىك تاماقتانۋدى ۇيىمداستىرۋدىڭ ءقاۋىپسىز جاعدايلارىنا اسەر ەتەتىن كريتەرييلەردى زەرتتەگەن بولاتىن. سوعان سايكەس ۇلتتىق داستۇرلەرگە جانە وڭىردە وندىرىلەتىن وتاندىق ونىمدەردىڭ اسسورتيمەنتىنە سايكەس ءمازىر ازىرلەندى.
اعىمداعى جىلدىڭ 1 قىركۇيەگىنەن باستاپ العاش رەت 1،6 ملن. استام وقۋشى، ونىڭ ىشىندە 1،4 ملن. استام باستاۋىش سىنىپ وقۋشىلارى جانە 220 مىڭ ءحاوت ساناتىنداعى 5-11 سىنىپ وقۋشىلارى تەگىن تاماقپەن قامتىلدى.