قازاقستان پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا سويلەگەن سوزىندە الداعى ماڭىزدى تاريحي داتا – ۇلى جەڭىستىڭ 80 جىلدىعىنا توقتالىپ، بۇل وقيعانىڭ بۇگىنگى حالىقارالىق احۋال ءۇشىن دە وزەكتى تاعىلىمى بار ەكەنىن ەرەكشە اتاپ ءوتتى. بۇل تۋرالى Aqshamnews.kz سايتى حابارلايدى.
پرەزيدەنتتىڭ ايتۋىنشا، ارادا سەگىز ونجىلدىق وتسە دە، 1945 جىلعى جەڭىستىڭ رۋحى – ۇلت پەن ۇلىستاردىڭ ىنتىماعى مەن ادامزاتتىڭ بەيبىت ومىرگە دەگەن ۇمتىلىسىنىڭ نىشانى بولىپ قالا بەرەدى.
"ەكى اپتادان كەيىن الەمدىك ماڭىزى بار تاريحي وقيعا – ۇلى جەڭىسكە 80 جىل تولادى. ءبىز بۇل مەرەيتويدى كەڭ كولەمدە اتاپ وتەمىز. قازاقستاننىڭ مايدانگەرلەرى مەن تىل ەڭبەككەرلەرى – بارشا حالقىمىز وتان ءۇشىن وتقا ءتۇستى"، – دەدى توقايەۆ.
ول جەڭىس كۇنىنىڭ تاعىلىمى – اسىرەسە قازىرگى الەمدەگى گەوساياسي شيەلەنىستەر مەن تۇراقسىزدىق جاعدايىندا – ەرەكشە ماڭىزدى ەكەنىن باسا ايتتى.
"ۇلى جەڭىستىڭ تاعىلىمى بارشا حالىققا، اسىرەسە، ساياساتكەرلەرگە كسەنوفوبياعا، ناسىلدىك جانە ۇلتتىق ۇستەمدىككە، حالىقارالىق قۇقىق قاعيداتتارىن قۇرمەتتەمەۋگە قۇرىلعان جاۋاپكەرشىلىكتەن جۇرداي ساياساتتىڭ سالدارى قانداي قاسىرەتكە اكەلەتىنىن ءالى كۇنگە دەيىن كورسەتىپ وتىر"، – دەدى مەملەكەت باسشىسى.
پرەزيدەنت قازىرگى الەمدىك ءتارتىپتىڭ سەنىم داعدارىسىن باستان كەشىرىپ جاتقانىن اتاپ ءوتتى. اسىرەسە، حالىقارالىق قۇقىق نورمالارىنىڭ السىرەۋى مەن حالىقارالىق ۇيىمداردىڭ بەدەلىنىڭ تومەندەۋى الاڭداۋشىلىق تۋدىراتىنىن جەتكىزدى.
"دۇنيە ءجۇزى سەنىم داعدارىسىمەن بەتپە-بەت كەلگەن شاقتا ەكسترەميستىك يدەولوگيانىڭ ورالۋى، پوپۋليزم مەن تالاس-تارتىستىڭ ءورشۋى، حالىقارالىق قۇقىقتىڭ قۇنسىزدانۋى، نەگىزگى حالىقارالىق ينستيتۋتتاردىڭ السىرەۋى بايقالادى"، – دەدى توقايەۆ.
ول قازاقستاننىڭ بۇل ۇدەرىستەرگە قارسى تۇرۋدا ايقىن ۇستانىم ۇستانىپ وتىرعانىن، حالىقارالىق بەيبىتشىلىك پەن قاۋىپسىزدىكتىڭ كەپىلى رەتىندە بۇۇ-نى رەفورمالاۋ مەن قولداۋدى بەلسەندى تۇردە ۇسىنىپ كەلە جاتقانىن اتاپ ءوتتى.
"قازاقستان بۇۇ جارعىسىن قاتاڭ ۇستانۋدى، ۇيىمدى رەفورمالاۋدى دايەكتى تۇردە ۇسىنىپ كەلەدى. قازىرگى جاعدايدا بۇۇ بالاماسى جوق عالامدىق ۇيىم بولىپ قالا بەرەدى. سوندىقتان ءبىز بۇۇ-نى قولدايمىز"، – دەپ تۇيىندەدى پرەزيدەنت.