قازاقستان پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا سويلەگەن سوزىندە كورشىلىك قارىم-قاتىناس پەن ايماقتىق تۇراقتىلىققا قاتىستى ۇستانىمىن ايقىنداپ، قازاق حالقىنىڭ تاتۋ كورشىلىك ءداستۇرىن قازىرگى زامانعى ديپلوماتيالىق ساياساتپەن ساباقتاستىرا ءبىلدى. بۇل تۋرالى Aqshamnews.kz سايتى حابارلايدى.
مەملەكەت باسشىسى قازاق حالقىنىڭ ءداستۇرلى قۇندىلىقتارىنىڭ ءبىرى – كورشىمەن تاتۋ تۇرۋ ەكەنىن اتاپ ءوتتى. بۇل ۇعىم تەك سالت-داستۇردە ەمەس، دىنىمىزدە دە بەكىتىلگەن قاعيدا رەتىندە سيپاتتالدى.
"قازاق قاشاندا كورشىسىن قادىرلەي بىلگەن. قۋانىشتا دا، قيىندىقتا دا كورشىسىنە سۇيەنگەن، كورشىنىڭ قاسىنان تابىلعان. ‘كورشى اقىسى – ءتاڭىر حاقىسى’ دەگەن ۇعىم دىنىمىزدە جانە داستۇرىمىزدە بار. بۇل – بىزگە اتادان قالعان وسيەت، انادان بەرىلگەن قاسيەت"، – دەدى توقايەۆ.
ول قازىرگى تاڭدا دا بۇل ءداستۇردىڭ جالعاسىپ كەلە جاتقانىن، كوپۇلتتى قوعامىمىزدا ءارتۇرلى ەتنوس وكىلدەرىنىڭ بەيبىت قاتار ءومىر ءسۇرىپ جاتقانىن مىسالعا كەلتىردى.
پرەزيدەنت قازاقستاننىڭ كورشى ەلدەرمەن تاتۋ، سىندارلى، باۋىرلاستىق نەگىزدەگى بايلانىسىن جوعارى باعالاپ، بۇل باعىتتا ەشقانداي تۇيتكىلدى ماسەلە جوق ەكەنىن باسا ايتتى.
"رەسەي – قازاقستاننىڭ بۇرىننان كەلە جاتقان نەگىزگى ستراتەگيالىق سەرىكتەسى ءارى سەنىمدى وداقتاسى. جۇڭگو ەلىمەن ىقپالداستىق تامىرى دا تەرەڭدە جاتىر. جۇڭگو حالقى قازاق حالقىنا ەشقاشان زيان كەلتىرگەن جوق، بولاشاقتا دا زيان كەلتىرمەيدى"، – دەدى مەملەكەت باسشىسى.
سونىمەن قاتار، قىرعىزستان، وزبەكستان، تۇرىكمەنستان جانە ازەربايجانمەن اراداعى رۋحاني، تاريحي باۋىرلاستىققا توقتالىپ، بۇل ەلدەرمەن ىنتىماقتاستىقتىڭ سەنىم مەن سىيلاستىققا نەگىزدەلگەنىن جەتكىزدى.
"الاتاۋدى تەڭ جايلاعان قىرعىزدار – ءبىر تۋعان باۋىرلارىمىز. ەجەلدەن ەنشىلەس وزبەك اعايىندى ءوز اعام دەپ ءقادىر تۇتامىز. تۇرىكمەندەردى تۋىس ساناپ، شىن جۇرەكتەن قۇرمەتتەيمىز. قارت كاسپييدىڭ جاعاسىنداعى ازەربايجان ەلىنە دەگەن ىقىلاسىمىز دا ەرەكشە"، – دەدى توقايەۆ.
پرەزيدەنت قازاقستان مەن رەسەي اراسىنداعى قۇرلىقتاعى ەڭ ۇزىن شەكارانىڭ بەيبىت تۇردە شەگەندەلۋىن ەرەكشە مىسال رەتىندە اتاپ ءوتتى. سونىمەن قاتار، ورتالىق ازياداعى مەملەكەتتەردىڭ دە شەكارا ماسەلەلەرى بويىنشا تاريحي شەشىمدەرگە قول جەتكىزگەنىن قۋانىشپەن جەتكىزدى.
"قىرعىزستان، وزبەكستان جانە تاجىكستان ۇزاق جىل بويى شەشىمىن تاپپاعان شەكارا ماسەلەسى بويىنشا ورتاق مامىلەگە كەلىپ، تاريحي كەلىسىمگە قول قويدى دەپ ايتۋعا بولادى. ءبىز باۋىرلاس ەلدەر ءۇشىن قۋانامىز، ولاردى ءاردايىم قولدايمىز"، – دەدى ول.