بۇكىل الەم ءۇشىن سىندارلى ديالوگ پەن پراگماتيزم – باستى قۇندىلىقتارعا اينالۋى ءتيىس
قازاقستان پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا حالىقارالىق تۇراقسىزدىق جاعدايىندا سىندارلى ديالوگتىڭ ماڭىزى مەن قازاقستاننىڭ ستراتەگيالىق باعىتى تۋرالى وي قوزعاپ، الەمدىك قاۋىمداستىقتى كەلىسىم مەن ءوزارا قۇرمەتكە نەگىزدەلگەن ارەكەتكە شاقىردى. بۇل تۋرالى Aqshamnews.kz سايتى حابارلايدى.
پرەزيدەنت قازىرگى كۇردەلى گەوساياسي جاعدايدا الەمدىك قاۋىمداستىق كەلىسىم مەن ءوزارا تۇسىنىستىككە نەگىزدەلگەن شەشىمدەر قابىلداۋعا ءماجبۇر ەكەنىن اتاپ ءوتتى.
"بەرەكەسىزدىككە بوي الدىرماۋ ءۇشىن الەمدىك قاۋىمداستىق مۇددەلەر توعىساتىن تۇستى ىزدەۋگە، كۇردەلى شەشىمدەر قابىلداۋعا جانە امالسىز مامىلەلەر جاساۋعا ءماجبۇر بولادى. ديالوگ جوق جەردە، قارسىلىق پەن تۇسىنىسپەۋشىلىك تۋىندايدى"، – دەدى توقايەۆ.
ونىڭ ايتۋىنشا، قازىرگى سىن-قاتەرلەرگە قارسى تۇرۋدىڭ جالعىز جولى – حالىقارالىق ىنتىماقتاستىقتى كۇشەيتۋ. ءوزارا تاۋەلدى الەمدە عالامدىق ماسەلەلەردى جالعىز شەشۋ مۇمكىن ەمەس.
"قازىرگى سىن-قاتەرلەردى اۋقىمدى حالىقارالىق ىقپالداستىق ارقىلى عانا جەڭە الامىز دەپ سەنەمىن. ءوزارا بىتە قايناسقان الەمدە عالامدىق ماسەلەلەردى شەشۋدىڭ بۇدان باسقا جولى جوق"، – دەپ ناقتىلادى مەملەكەت باسشىسى.
ادىلدىك پەن تەڭدىككە نەگىزدەلگەن كەلىسسوزدەر – بەيبىت الەم كەپىلى
توقايەۆ بەيبىت الەم قۇرۋدا پراگماتيزم مەن ءوزارا قۇرمەت، ادىلەتتىلىك پەن ەشكىمدى الالاماۋ قاعيداتتارىنىڭ ەرەكشە ماڭىزعا يە ەكەنىن اتاپ ءوتتى.
"سوندىقتان پراگماتيزم مەن ءوزارا قۇرمەتكە، تەڭدىككە، ادىلدىككە، ەشكىمدى الالاماۋعا نەگىزدەلگەن سىندارلى كەلىسسوزدەر مەن تۇراقتى بايلانىستار حالىقارالىق جاعدايدى وڭالتىپ، شيەلەنىستەردىڭ ءتۇيىنىن تارقاتادى"، – دەدى ول.
بۇل تۇجىرىم – قازاقستاننىڭ بەيبىت سىرتقى ساياساتىنىڭ نەگىزى مەن الەمدىك تۇراقتىلىققا قوسىپ وتىرعان ۇلەسىنىڭ كورىنىسى.
مەملەكەت باسشىسى ىشكى ساياساتتا دا سىرتقى جاعدايعا بەيىمدەلە وتىرىپ، ناقتى جانە ۇزاق مەرزىمدى ماقساتتارعا جۇيەلى تۇردە ۇمتىلۋ قاجەت ەكەنىن ايتتى.
"ءقازىر بۇكىل الەمنىڭ بولاشاعى بۇلىڭعىر بولىپ تۇر. وسى الماعايىپ زاماندا ستراتەگيالىق باعدارىمىزعا ساي ارەكەت ەتۋ – الدىمىزدا تۇرعان اسا ماڭىزدى مىندەت"، – دەدى توقايەۆ.
ول قازاقستاننىڭ قولعا العان اۋقىمدى جوبالاردى جالعاستىراتىنىن، ينۆەستيسيا تارتۋ مەن ونەركاسىپتىك الەۋەتتى ارتتىرۋ باعىتىندا ناقتى جۇمىستار جالعاساتىنىن جەتكىزدى.
"ۇزاق مەرزىمگە ارنالعان ماقساتتارىمىزعا قول جەتكىزۋ ءۇشىن تياناقتى ءارى ءتيىمدى جۇمىس ىستەۋىمىز كەرەك"، – دەپ قورىتىندىلادى پرەزيدەنت.