2-3 قىركۇيەكتە الماتى قالاسىنداعى «بورالداي» ساق قورعاندارىندا «ۇلى دالا – كوشپەندىلەر الەمى» حالىقارالىق ەتنوفەستيۆالى وتەدى.
قالا كۇنىنە ورايلاستىرىلعان فەستيۆال «الماتى – شانحاي ىنتىماقتاستىق ۇيىمىنىڭ مادەني جانە تۋريستىك استاناسى» جوباسى اياسىندا ۇيىمداستىرىلعان، دەپ حابارلايدى Almaty-akshamy.kz.
شارانىڭ باستى ماقساتى - كوشپەندىلەر مادەنيەتىن، ەجەلگى تاريحى مەن ءسالت-داستۇرىن كورسەتۋ. فەستيۆالدا كوشپەندىلەردىڭ جاۋىنگەرلىك ويىندارى، ساياتشىلىعى، ات باپتاۋى، تاعامدارى، قولونەرى ت.ب كوپتەگەن تۇرمىس-تىرشىلىگى كورسەتىلەدى. شاراعا جينالعان حالىق ءتۇرلى سايىستاردى تاماشالاپ، قىزىقتى شەبەرلىك ساباقتارعا قاتىسىپ، كوشپەندىلەردىڭ وتكەن داۋىرىنە ساياحات جاسايدى.
فەستيۆالدە ازەربايجان، تۇركيا، ماجارستان (ۆەنگريا)، مالايزيا، باشقۇرتستان، داعىستان، چۋۆاشيا، التاي، بۋرياتيا، وزبەكستان جانە قىرعىزستان سىندى 10 نان استام مەملەكەتتەن جينالعان ەڭ مىقتى ەتنومۋزىكانتتار مەن سپورتشىلار ونەر كورسەتەدى.
«ۇلى دالا – كوشپەندىلەر الەمى» حالىقارالىق فەستيۆالىندە 50-گە جۋىق كيىز تىگىلەدى. كوكپار، قىز قۋۋ. اۋدارىسپاق، تەڭگە ءىلۋ، جامبى اتۋ، اساۋعا قۇرىق سالۋ، اساۋدى ۇيرەتۋ، تۇيە باۋ، بيە باۋ، نايزا شانشۋ، ساداق اتۋدى ۇيرەنۋ، ءجۇن ساباۋ، ۇرشىق ءيىرۋ، كيىز، تەكەمەت باسۋ، الاشا، كىلەم، شي، كەستە توقۋ، زەرگەرلىك ت.ب. بۇيىمدار جاساۋ جانە شەبەرلىك ساباقتارى سەكىلدى ۇلتتىق ويىندار ۇيىمداستىرىلادى. سونىمەن قاتار قازاقتىڭ ۇلتتىق تاعامدارى دا فەستيۆال بارىسىندا جۇرتشىلىق نازارىنا ۇسىنىلادى.
فەستيۆال سوڭىندا ساياتشىلاردىڭ شوۋ باعدارلامالارى، ءارتۇرلى مەملەكەتتەردىڭ جاۋىنگەرلىك ويىندار كورسەتىلىمى، شەتەلدىك جانە قازاقتاندىق ەتنوتوپتار كونسەرتى (ۇلىتاۋ، حاسساق) قويىلادى.
تۇرعىنداردى فەستيۆال ايماعىنا جەتكىزۋ جاعى قاراستىرىلعان. ورتالىق ستاديون، ن.ساس اتىنداعى تەاتر شالياپين- 22 (التىنسارين داڭعىلى جاعىنان)، "الاتاۋ" ءداستۇرلى ونەر تەاترى (مومىش ۇلى كوشەسى جاعىنان)، الماتى-1 تەمىر جولى (اۆتوتۇراق) ارنايى كولىكتەر قاتىنايتىن بولادى. فەستيۆالگە كىرۋ تەگىن.
