5 جىل بۇرىنعى كەزەڭمەن سالىستىرعاندا بۇل كورسەتكىش 25 پايىزدان اسىپ كەتكەن
بىلتىرعى قورىتىندى بويىنشا ءوز ماماندىعىمەن جۇمىس ىستەمەيتىن قازاقستاندىقتاردىڭ سانى 2 ميلليون ادامعا جەتكەن، دەپ حابارلايدى Almaty-akshamy.kz.
Finprom ساراپشىلارىنىڭ مالىمەتىنشە، بەس جىل بۇرىنعى كەزەڭمەن سالىستىرعاندا بۇل كورسەتكىش 25 پايىزدان اسىپ كەتكەن. البەتت، بۇل احۋالدى جالپى ەڭبەك نارىعىنىڭ وسۋىمەن بايلانىستىرۋعا دا بولار ەدى، الايدا ءوز ماماندىعىنان تىس جۇمىس ىستەيتىن ادامداردىڭ جىلدىق ۇلەسىن سالىستىراتىن بولساق، وزگە ءۇردىستى كورۋگە بولادى. قازاقستاندا ونداي جۇمىسشىلاردىڭ سانى عانا ەمەس، ولاردى جۇمىسپەن قامتۋداعى ۇلەس تە ارتىپ كەلەدى.
«ەڭبەك مينيسترلىگى وقۋ ورىندارىن بىتىرگەن تۇلەكتەردىڭ 40 پايىزعا جۋىعى ءوز ماماندىعى بويىنشا جۇمىس ىستەمەيتىنىن ايتتى. بۇل جالپى ەكونوميكا ءۇشىن دە، كەيىننەن باسقا ءبىلىم الاتىن نەمەسە ماماندىعى بويىنشا جالاقىسى تومەن قىزمەتتە ىستەيتىن ستۋدەنتتەر ءۇشىن دە جاعىمسىز سالدارعا اكەپ سوعۋى مۇمكىن. ديپلومى بار تۇلەكتەر بارىپ جاتسا دا، سۇرانىسقا يە ماماندىقتار بويىنشا بوس ورىندار ءالى دە تولعان جوق»، - دەلىنگەن زەرتتەۋدە.
مىسالى، 2023 جىلى جوعارى وقۋ ورىندارى مەن كوللەدجدەردى 300،7 مىڭ ستۋدەنت ءبىتىردى. ولاردىڭ تورتتەن ءبىرى (24%) – بولاشاق باستاۋىش سىنىپ مۇعالىمدەرى، ءپان مۇعالىمدەرى مەن تاربيەشىلەر. ءدال سونداي ۇلەسپەن – ءارقايسى التى پايىزدان – قىزمەت كورسەتۋ، ءوندىرىس، سونداي-اق بيزنەس، باسقارۋ جانە قۇقىق سياقتى ساناتتار جالپى كورسەتكىشكە يە بولىپ وتىر.
«ەكونوميستەر، زاڭگەرلەر مەن قارجىگەرلەرگە سۇرانىستىڭ ازدىعىنا قاراماستان، تالاپكەرلەردىڭ بۇل ماماندىقتاردى ءالى دە كوپ تاڭدايتىنىن ستاتيستيكا راستاپ وتىر. بيىلدىڭ وزىندە 12،4 مىڭ تۇلەك سەرتيفيكاتتالعان زاڭگەرلەر مەن ەكونوميستەر قاتارىنا قوسىلدى. ونىڭ ىشىندە 7،6 مىڭ ادام زاڭگەر دارەجەسىن الدى. دەگەنمەن قازاقستاندىق ەڭبەك نارىعىنىڭ زاڭگەرلەرگە دەگەن ناقتى قاجەتتىلىگى 2023 جىلى شامامەن بەس ەسەگە از بولدى: بار بولعانى 1،6 مىڭ مامان. ياعني، زاڭگەرلەر سۇرانىسقا يە ماماندىقتار تىزىمىندە ءبىرىنشى وندىققا دا، ءتىپتى ەكىنشى وندىققا دا ەنبەيدى»، - دەيدى ماماندار.
بولجامدارعا سايكەس، بيىل مۇعالىمدەرگە سۇرانىس جوعارى بولادى – ولاردىڭ ۇلەسىنە بوس ورىنداردىڭ 8،4%-ى دەرلىك كەلەدى. سونداي-اق قازاقستاندىق جۇمىس بەرۋشىلەرگە 10،2 مىڭنان استام بۋحگالتەر قاجەت– بۇل كادرلارعا دەگەن جالپى قاجەتتىلىكتىڭ 4،7%-ىن قۇرايدى. سونىمەن قاتار قازاقستاندىق ەڭبەك نارىعىنىڭ نەگىزگى سۇرانىسقا يە بولىگى – ارنايى بىلىكتىلىگى جوق كادرلار. سوندىقتان سۇرانىستى الدىڭعى قاتارىندا كۇزەتشىلەر، دۇكەن ساتۋشىلارى مەن جۇرگىزۋشىلەر تۇر.