ۇلىتاۋ، الماتى وبلىسى كوماندالارى نەگە جارىستان شىعىپ قالدى؟
كەشە، 15 قىركۇيەكتە «ۇلى دالا جورىعى» مارافون-بايگەسىنىڭ ونىنشى كەزەڭى اياقتالدى. شاباندوزدار بەلگىلەنگەن مارشرۋتتىڭ 950 شاقىرىمىن باسىپ ءوتتى.
ونىنشى كەزەڭ قورىتىندىسى بويىنشا، تۇركىستان وبلىسىنىڭ كومانداسى جەڭىمپاز اتاندى. بۇل جولى ماڭعىستاۋلىق شاباندوزدار مارە سىزىعىنا ەكىنشى بولىپ كەلسە، قوستاناي وبلىسىنىڭ كومانداسى ءۇشىنشى بولىپ جەتتى. وكىنىشكە قاراي، بۇل كۇنى ەكى كۇن قاتارىنان جەڭىمپاز بولعان الماتى وبلىسى كومانداسىمەن جانە ۇلىتاۋ «كوكبورىلەرىمەن» قوشتاسۋعا تۋرا كەلدى.
مارافوننىڭ باس تورەشىسى نادەجدا كۋپسوۆانىڭ ايتۋىنشا، الماتى وبلىسى كومانداسىنىڭ ءبىر اتى 10-كەزەڭنىڭ العاشقى 50 شاقىرىمىندا بولدىرىپ، كوماندا فينيشقا جەتە الماپتى. ال ۇلىتاۋلىق اتتىڭ اپتاپ ىستىقتان جۇرەك سوعىسى جيىلەپ، قالىپقا ءتۇسۋى قيىنداعان.
«تاڭەرتەڭ الماتى وبلىسى اتىنىڭ شابىسىنا قاراپ-اق ۇزاققا بارمايتىنىن سەزدىك. كوماندا مۇشەلەرى ءوتىنىپ قويماعان سوڭ ءارى راسىمەن اتتىڭ جاعدايى جاقسارىپ كەلە جاتقان سوڭ جورىققا شىعۋىنا رۇقسات بەردىك. كوپ ۋاقىت وتپەي، ات بولدىرىپ قالدى. سونىمەن قاتار اتالمىش كوماندا سوڭعى ەكى كۇندە قاتتى شاپتى. 2 كەزڭنىڭ كۋبوگى بۇيىرعانمەن تۇركىستانعا دەيىن جەتە المادى. بۇل جورىقتا جەڭىسكە جەتۋ ءۇشىن ءايلا-تاسىل مىقتى بولۋ كەرەك. ۇلىتاۋ اتىن ۆەتەرينارلار 10-كەزەڭنىڭ العاشقى شاقىرىمىن ەڭسەرگەننەن كەيىن مۇقيات تەكسەردى. جۇرەك سوعىسىنىڭ جيىلىگى جوعارى بولدى. اتقا زاقىم كەلتىرمەۋ ءۇشىن كەلەسى 50 شاقىرىمعا جىبەرمەدىك»، - دەدى باس تورەشى ن.كۋپسوۆا.
الدا 4 كەزەڭ، ياعني 350 شاقىرىم قالدى. 9 كوماندا 16 قىركۇيەكتە تاڭعى ساعات 7:00-دەن باستاپ العاشقى 50 شاقىرىمدى ەڭسەرۋگە اتتانادى. تۇسكى استان سوڭ 9-كەزەڭنىڭ كەزەكتى 50 شاقىرىمىن باعىندىرۋى ءتيىس. سونىمەن كوماندالار الدىندا 1050ء-ىنشى شاقىرىمدى ەڭسەرۋ مىندەتى تۇر.
ون كۇننىڭ قورىتىندىسى بويىنشا كوماندالاردىڭ جالپى ۋاقىتى:
ماڭعىستاۋ وبلىسى، 64 ساعات 53 مينۋت 55 سەكۋند
قوستاناي وبلىسى، 66 ساعات 31 مينۋت 31 سەكۋند
اقتوبە وبلىسى، 67 ساعات 06 مينۋت 56 سەكۋند
جەتىسۋ وبلىسى، 68 ساعات 26 مينۋت 09 سەكۋند
استانا قالاسى، 70 ساعات 51 مينۋت 00 سەكۋند
الماتى قالاسى، 72 ساعات 21 مينۋت 31 سەكۋند
تۇركىستان وبلىسى، 75 ساعات 52 مينۋت 35 سەكۋند
اباي وبلىسى، 75 ساعات 55 مينۋت 54 سەكۋند
قاراعاندى وبلىسى، 83 ساعات 57 مينۋت 04 سەكۋند
استانا قالاسى، ماڭعىستاۋ، جەتىسۋ، قوستاناي وبلىستارىنىڭ شاباندوزدارى دا 650 شاقىرىمدى ءجۇرىپ وتكەن تۇلپارلارىمەن تۇركىستانعا دەيىنگى 1300 شاقىرىمدى ەڭسەرمەك. بۇل كومانداعا تورەشىلەر «رەكورد» دەگەن اتاۋ بەرىپ، ارنايى 13ء-ىنشى كوماندا رەتىندە تىركەپ، ناتيجەلەرىن كۇندەلىكتى بەلگىلەپ وتىر. «رەكورد» كومانداسىنىڭ جىگىتتەرى دىتتەگەن ماقساتىنا جەتسە، كەلەسى جىلعى جورىققا گيننەس رەكوردتار كىتابىنىڭ وكىلدەرىن شاقىرتۋ جوسپاردا بار.
«ۇلى دالا جورىعى» رەسپۋبليكالىق مارافون-بايگەسىنىڭ باس سەرىكتەسى – «Sport Qory» تۋريزم يندۋسترياسى مەن سپورتتى قولداۋ قورى.