قازاقستان قىتايعا ەت ەكسپورتتايدى

ءبىزدىڭ ەل بيىل قىتايعا ەت ەكسپورتتاۋدى باستايدى، دەپ حابارلايدى Almaty-akshamy.kz «حابار 24» سىلتەمە جاساپ.

كورشى ەلمەن كەلىسسوز ءجۇرىپ جاتىر. بۇل تۋرالى اۋىل شارۋاشىلىعى ءمينيسترىنىڭ ورىنباسارى ەربول تاسجۇرەكوۆ مالىمدەدى. باتىسقازاقستاندىق شارۋالارمەن كەزدەسۋدە وسى سالاداعى ءوڭىر ءۇشىن وزەكتى ماسەلەلەر تالقىعا ءتۇستى. مۇنداعى شارۋالار كيىكتەن كەلگەن شىعىندى وتەۋ، سول ءۇشىن ەسەپتەۋ ادىستەمەسىن بەكىتۋ جانە شەتەلگە ساتىلعان كۇنباعىستىڭ ءار تونناسىنا سالىناتىن 100 ەۋرو باج الىمىن جويۋدى سۇرايدى.

جالپى ورال ءوڭىرى – ەڭ مالدى ايماقتىڭ ءبىرى. سوندىقتان ءوڭىر شارۋالارىن قىزىقتىرعان باستى ماسەلەنىڭ ءبىرى – ەت وتكىزۋ جايى.

ەربول تاسجۇرەكوۆ، ق ر اۋىل شارۋاشىلىعى ءمينيسترىنىڭ ورىنباسارى:

- ەت ونىمدەرىن شىعارۋ بويىنشا ءبىرقاتار جۇمىس جاسالدى. مانا ايتىپ كەتتىم ءتۇسىندىرىپ. اسىرەسە مىنا جۇڭگو ەلىمەن ۇلكەن كەلىسسوزدەر جۇرگىزىپ جاتىر، ەتتى وسى قىتايعا ەكسپورتتاۋعا. ءبىر عانا قىتايدىڭ ش ۇ ا ر پروۆينسياسى جىلىنا 20 ملن توننا ەت يمپورتتايدى ەكەن. سوعان بارشا مۇمكىنشىلىگىمىز بار. 3 پروۆينسيامەن جاقىندا كەلىسسوزدەر ءوتتى. سونىڭ ءبارىنىڭ ناتيجەسىندە ەڭ باستى سۇراق – جۇڭگو نارىعىن بىزگە اشۋ، اۋىلشارۋاشىلىق ونىمدەرىن قىتايعا ەكسپورتتاۋ ماسەلەسى.