ەل تاعدىرىنا قاتىستى ماڭىزدى وقيعادان ۇلتتىق ۇلان اسكەري قىزمەتشىلەرى دە قالىس قالماي، ءوز داۋىستارىن بەرۋدە.
تاڭعى ساعات 07.00-دە الماتىداعى 5571 اسكەري بولىمىندەگى №107 داۋىس بەرۋ ۋچاسكەسىنە العاشقىلاردىڭ ءبىرى بولىپ قازاقستان رەسپۋبليكاسى ۇلتتىق ۇلان باس قولباسشىسىنىڭ ورىنباسارى گەنەرال-مايور باۋىرجان ءابجانوۆ كەلىپ، داۋىس بەردى، دەپ حابارلايدى aqshamnews.kz
ەكىنشى «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امىرەيەۆتە ءوز تاڭداۋىن جاسادى.
"قۇقىقتىق ءتارتىپ اسكەرلەرىنىڭ اسكەري قىزمەتشىلەرى بارلىق ۋاقىتتا جوعارى ازاماتتىق جاۋاپكەرشىلىك پەن پاتريوتتىق رۋح تانىتادى. ۇلتتىق ۇلان ەلىمىزدىڭ تىنىشتىعى مەن تۇراقتىلىعىنا جاۋاپ بەرەتىن اسكەري قۇرىلىم. بۇگىنگى سايلاۋعا ءاربىر اسكەري قىزمەتشى بەلسەندى قاتىسىپ، ءوز تاڭداۋلارىن جاسايتىنىنا سەنىمدىمىن"، - دەيدى گەنەرال-مايور باۋىرجان ءابجانوۆ.
«وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پولكوۆنيك نيازتاي الكەشيەۆتىڭ ايتۋىنشا، اسكەري بولىمدەردە اشىلعان سايلاۋ ۋچاسكەلەرىندە داۋىس بەرۋشىلەردىڭ بەلسەندىلىگى وتە جوعارى. اسكەري قىزمەتشىلەردىڭ جەكە قۇرامى عانا ەمەس، ولاردىڭ وتباسى مۇشەلەرى دە ساياسي ناۋقانعا تۇگەل قاتىسۋدا.
ۇلتتىق ۇلاننىڭ «وڭتۇستىك» وڭىرلىككە قاراستى اسكەري بولىمدەردىڭ وتان الدىنداعى ازاماتتىق بورىشىن وتەپ جۇرگەن جاۋىنگەرلەرى اسكەري قالاشىقتار اۋماعىندا ورنالاسقان 10 سايلاۋ ۋچاسكەسىندە داۋىس بەرۋدە.
ايتا كەتەيىك، «وڭتۇستىك» وڭىرلىك قولباسشىلىعىنا قاراستى اسكەري بولىمدەردە سايلاۋ قۇقىعى بار ون مىڭعا جۋىق ازامات قىزمەت ەتەدى.