بۇل سىناق جىلىنا ەكى رەت قىسقى جانە جازعى وقۋ كەزەڭىن قورىتىندىلاۋ كەزىندە قايتالانىپ وتىرادى. اسكەريلەر جىل بويىنا ءتۇرلى وقۋ-جاتتىعۋلارعا قاتىسادى، پوليگونداردا دالالىق شىعۋ كەزىندە اسكەري ماشىقتارىن شىڭداپ، دەنەشىنىقتىرۋمەن ۇزبەي اينالىسادى. سونىمەن قاتار كوماندالىق-شتابتىق جاتتىعۋلار، اسكەري ويىندار وتكىزىلىپ، ءار اسكەري قىزمەتشى جەكە ادىستەمەلىك تاپسىرمالار ورىندايدى.
نەگىزگى ماقساتى - جەكە قۇرامنىڭ ماشىعىن، ۆزۆودتاردىڭ، روتالاردىڭ، قۇرامالار مەن بولىمدەر باتالوندارى باسقارمالارىنىڭ شىنايى دەڭگەيىن، بولىمشەلەردىڭ قىسقا مەرزىمدە قويعان جاۋىنگەرلىك تاپسىرمالاردى ورىنداۋعا ازىرلىكتەرىن تەكسەرۋ. سونداي-اق وقۋ-جاۋىنگەرلىك تاپسىرمالاردى پىسىقتاۋ، جاۋىنگەرلىك دايارلىق جوسپارلارى مەن باعدارلامالارىن ورىنداۋ بارىسىندا بولىمشەلەر مەن ولاردىڭ باسقارۋ ورگاندارىنىڭ جاۋىنگەرلىك دايارلىعى مەن ۇيلەسىمدىلىگىنىڭ دەڭگەيىن باعالاۋ.
كەز كەلگەن وقۋ ورنىنداعى سياقتى، وقۋ كەزەڭىنىڭ سوڭىندا سىناق قابىلدانادى. اسكەري قىزمەتشىلەر ءۇشىن بۇل ەمتيحان – قورىتىندى تەكسەرۋ. كىم قانداي جەتىستىككە قول جەتكىزدى، كىم نەنى ۇيرەندى – وسىنىڭ ءبارى سىناق كەزىندە انىقتالادى.
شىرت ۇيقىدا جاتقان جەكە قۇرام تاڭ قىلاۋ بەرە دابىلمەن تۇرعىزىلىپ، جاۋىنگەرلىك ازىرلىك بويىنشا وقۋ-جاتتىعۋعا كىرىسىپ كەتتى. بۇدان باسقا اسكەريلەردىڭ الدىندا ساپتىق دايىندىق، اتۋ دايىندىعى، دەنە دايىندىعى، جالپى اسكەري جارعىلار، مەملەكەتتىك-قۇقىقتىق دايىندىق جانە باسقا پاندەردەن سىناقتار كۇتىپ تۇر. ءاربىر سارباز، سەرجانت، وفيسەر بۇل سىناقتىڭ سالماعىن سەزىنىپ، ۇلكەن جاۋاپكەرشىلىكپەن قاراۋدا. وفيسەرلەر قۇرامىنىڭ كاسىبي دايىندىعىنا دا ايرىقشا نازار اۋدارىلماق.
سىناق ناتيجەسى بويىنشا ءار اسكەري قىزمەتشىگە جەكە-جەكە باعا قويىلىپ، سودان اسكەري بولىمدەرگە جالپى باعا شىعارىلادى.
“جالپى، اسكەريلەردىڭ دايىندىعى جامان ەمەس. ولار بىلتىرعى كۇزدە اتتەستاسيادان ءوتىپ، كاسىبي بىلىكتىلىكتەرى مەن دايىندىقتارىن دالەلدەپ شىققان بولاتىن. بۇدان كەيىن قايتادان جاڭا وقۋ كەزەڭى باستالادى. اسكەريلەردىڭ وقۋى ءۇزىلىسسىز جالعاسا بەرەدى. بۇل وقۋدا كانيكۋل دەگەن ۇعىم جوق. ۇنەمى جاۋىنگەرلىك ازىرلىكتە بولۋدىڭ تالابى – وسى. جاۋىنگەرلىك دايىندىقتىڭ ساپاسى نەعۇرلىم جوعارى بولسا، سوعۇرلىم جاۋىنگەرلىك ازىرلىك جوعارى بولماق. ءبىز، ۇلتتىق ۇلان اعا بۋىنىنىڭ ۇزدىك داستۇرلەرى نەگىزىندە تاربيەلەنگەن «وڭتۇستىك» وڭىرلىك قولباسشىلىعىنىڭ جەكە قۇرامى قورىتىندى تەكسەرۋدى ابىرويمەن تاپسىرىپ، سەنىمدى اقتاپ شىعارىنا سەنىمدىمىز”، - دەيدى پودپولكوۆنيك باقىت الىپبايەۆ.
