ۇلتتىق ۇلاننىڭ اسكەري قىزمەتشىلەرى ءارقاشان كومەككە كەلۋگە دايىن
اقتوبە قالاسىنىڭ اۋماعىندا سۋ تاسقىنى جاعدايىن جويۋعا 6655 اسكەري ءبولىمىنىڭ جەدەل ماقساتتاعى باتالونىنان 60 اسكەري قىزمەتشى جۇمىلدىرىلدى، دەپ حابارلايدى Almaty-akshamy.kz ق ر ۇلتتىق ۇلاننىڭ باسپا ءسوز قىزمەتىنە سىلتەمە جاساپ.
سۋ تاسقىنى جاعدايىنا بايلانىستى، اقتوبە وبلىسى اكىمىنىڭ شەشىمىمەن 31 ناۋرىز كۇنى ساعات 20.00-دەن باستاپ اقتوبە وبلىسى تج دەپارتامەنتىنىڭ اۋماعىندا جەدەل شتاب قۇرىلدى.
قۇتقارۋ جۇمىستارىنا ۇلتتىق ۇلان 6655 اسكەري ءبولىمىنىڭ كومانديرى پولكوۆنيك ميراس تۇردالين 60 اسكەري قىزمەتشىدەن تۇراتىن جەدەل اسكەري رەزەرۆتىڭ قۇتقارۋ جاساعىن، سونداي-اق ەكى ارنايى قۇتقارۋ تەحنيكاسىن ءبولدى.
«نەگىزگى كۇش-جىگەر توتەنشە جاعداي اۋدانىندا اۆاريالىق-قۇتقارۋ جۇمىستارىن جۇرگىزۋگە جۇمىلدىرىلعان. اۋداننىڭ جەرگىلىكتى اتقارۋشى ورگاندارىمەن بىرلەسىپ، تۇرعىنداردى ەۆاكۋاسيالاۋ جانە اۆاريالىق-قۇتقارۋ جۇمىستارىن جۇرگىزۋ ۇيىمداستىرىلدى. حالىققا كومەك قاۋىپسىزدىك شارالارىن تولىق ساقتاي وتىرىپ جۇرگىزىلۋدە»، - دەيدى 2 جەدەل ماقساتتاعى باتالونى 3 روتاسىنىڭ كومانديرى كاپيتان ن. مولداشيەۆ.
ۇلتتىق ۇلاننىڭ اسكەري قىزمەتشىلەرى ءارقاشان كومەككە كەلۋگە دايىن. وزدەرىنىڭ فۋنكسيونالدىق مىندەتتەرىنە سايكەس، ولار تابيعي، تەحنوگەندىك جانە الەۋمەتتىك سيپاتتاعى توتەنشە جاعدايلاردىڭ سالدارىن جويۋعا قاتىسادى.
تەز جانە ءتيىمدى ارەكەت ەتۋ ارقىلى قۇقىقتىق ءتارتىپ اسكەرلەرى ءىس جۇزىندە ادامدارعا كومەكتەسۋگە دايىن ەكەندىكتەرىن دالەلدەدى. بۇعان باتىس قازاقستان، قاراعاندى، سولتۇستىك قازاقستان جانە تۇركىستان وبلىستارىنىڭ تۇرعىندارى ماۋسىمدىق سۋ تاسقىنى كەزىندە، سونداي-اق ماقتاارال اۋدانىنىڭ تۇرعىندارى 2020 جىلى سۋ تاسقىنىن جويۋ كەزىندە كوز جەتكىزدى.
سونىمەن قاتار، ۇلاندىقتار جىل سايىن قاتتى ايازدا قالاارالىق جولداردا قالعانداردى قار قۇرساۋىنان شىعارادى.