2021 جىلدىڭ ساناعىنىڭ ۇرانى – «قازاقستاندا اركىم ماڭىزدى! ۆ كازاحستانە كاجدىي ۆاجەن!».
ۇلتتىق ساناقتى وتكىزۋ ءۇشىن ۇلتتىق ستاتيستيكا بيۋروسىمەن بىرەۋى 39 603،2 تەڭگەدەن، جالپى سوماسى 1 085،6 ملن تەڭگەگە تەحنيكالىق ەرەكشەلىك تالاپتارىنا سايكەس كەلەتىن قىتايدا شىعارىلعان 27 412 دانا KOUZONE MTK6592 پلانشەت كومپيۋتەرى ساتىپ الىندى. سونداي-اق، قوسىمشا گارنيتۋرالار – پلانشەت قالامدارى، قورعانىش تىسقابى، قورعانىش شىنىسى، power bank الىندى.
پلانشەتتەردى ينتەرۆيۋەرلەر ءۇي-ۇيدى ارالاۋ كەزىندە مالىمەتتەردى جيناۋ مەن تىركەۋ ءۇشىن پايدالاناتىن بولادى. بۇل قىزمەتكەرلەردىڭ ەڭبەك شىعىنىن تومەندەتۋگە، جيناقتىلىعىن ارتتىرۋعا جانە قاعاز بەن كەڭسە قۇرالدارىنا جۇمسالاتىن شىعىندى ۇنەمدەۋگە مۇمكىندىك بەرەدى. ونىمەن قوسا، ساناق دەرەكتەرىنىڭ ساپاسى مەن ناقتىلىعى ارتتىرىلىپ، دەرەكتەر ساپاسىنا ادام فاكتورىنىڭ ىقپالى بارىنشا ازايتىلادى. پلانشەت پەن ارنايى باعدارلاما ارقىلى ينتەرۆيۋەر ساۋالنامانى وندا ورناتىلعان بارلىق اريفمەتيكالىق جانە لوگيكالىق باقىلاۋلارمەن قوسا، كلاسسيفيكاتور جانە انىقتامالىقتاردى پايدالانا وتىرىپ جۇرگىزە اسىرادى. الىنعان مالىمەتتەر تىكەلەي جالپى دەرەكتەر بازاسىنا جىبەرىلەدى.
بيۋرودا پلانشەتتەردىڭ ارى قاراي ساناق اياقتالعاننان كەيىن دە قولدانىستا بولاتىندىعى اتاپ كورسەتىلدى. ولاردىڭ باسىم بولىگى قازاقستاندىق مەكتەپتەرگە بەرىلەدى. تاعى ءبىر بولىگى ۇلتتىق ستاتيستيكا بيۋروسىندا اي سايىنعى، توقساندىق، جىلدىق سالالىق باقىلاۋلار مەن زەرتتەۋلەر جۇرگىزۋ ءۇشىن قالدىرىلادى.
2021 جىلدىڭ ۇلتتىق ساناعى 1 قىركۇيەكتەن 30 قازانعا دەيىنگى ارالىقتا جۇرگىزىلەدى. وعان ونلاين رەجيمىندە دە، ءداستۇرلى تاسىلمەن دە قاتىسۋعا بولادى.