وتكەن اپتادا ۇلتتىق قورعانىس ۋنيۆەرسيتەتىن 145 ماگيسترانت ءبىتىرىپ، «جاس ۇلان» رەسپۋبليكالىق مەكتەپتەرىنىڭ 889 تۇلەگىنە اتتەستاتتار تابىستالدى.
قورعانىس مينيسترلىگىندە وتكەن اپپارات كەڭەسىندە اپتا قورىتىندىلانىپ، الداعى كەزەڭدەرگە مىندەتتەر جۇكتەلدى.
باس قولباسشىلار مەن قولباسشىلار ماماندىق بويىنشا دايارلىقتىڭ ءوتۋ بارىسىن باياندادى. قۇرلىق اسكەرلەرىندە بارلىق باعىتتارداعى ماماندار ساباقتار، ونىڭ ىشىندە دەسانتشى جاۋىنگەرلەردىڭ پاراشيۋتپەن سەكىرۋلەرىن وتكىزۋدە. تاۋداعى ءالپى بولىمشەلەرى اسكەري قىزمەتشىلەرىنىڭ ءىس جۇزىندەگى جيىندارى مەن جاتتىعۋلارى باستالدى، دەپ حابارلادى Almaty-akshamy.kz. ق ر قورعانىس مينيسترلىگىنىڭ سايتىنا سىلتەمە جاساپ.
اۋە قورعانىسى كۇشتەرىندە جوسپارلى ۇشۋ وقۋ-جاتتىعۋلارى، ۇشۋ قۇرامىنىڭ پاراشيۋتتىك دايارلىعى جانە ءاشقق اسكەرلەرىنىڭ اسكەري قىزمەتشىلەرىنە تەحنيكالاردى ۇيرەتۋ جۇرگىزىلەدى.
اسكەري-تەڭىز كۇشتەرىندە تەڭىزشىلەر كەمەنىڭ ماتەريالدىق بولىگىن، بەرىكتىككە كۇرەس ءىس-شارالارىنداعى جەكە ءىس-قيمىل ءتارتىبىن پىسىقتايدى. ماماندىق بويىنشا دايىندىق كەزەڭى بيىل 2 شىلدەدە باقىلاۋ ساباقتارىنىڭ وتۋىمەن اياقتالادى.
جۋىردا راديوەلەكترونيكا جانە بايلانىس اسكەري-ينجەنەرلىك ينستيتۋتىندا، قۇرلىق اسكەرلەرىنىڭ اسكەري ينستيتۋتىندا وفيسەرلەر، شوقان ءۋاليحانوۆ اتىنداعى قورعانىس مينيسترلىگىنىڭ اسكەري كوللەدجىندە سەرجانتتار وقۋىن ءبىتىرىپ، ولاردى ءبولۋ جوسپارلانۋدا.
كەڭەس بارىسىندا اسكەري وقۋ ورىندارى تۇلەكتەرىنىڭ قىزمەت وتكەرۋىنە تۇراقتى مونيتورينگ جۇرگىزۋ تاپسىرىلدى. ونىڭ نەگىزىندە قاجەت بولعان جاعدايدا كادرلاردى نەعۇرلىم ءتيىمدى دايارلاۋ ءۇشىن وقۋ ۇردىسىنە تۇزەتۋلەر ەنگىزۋدى جۇكتەدى.
«سيفرلىق وفيسەر» وقۋ جوباسىن ىسكە اسىرۋ تۋرالى جەكە باياندالدى. بۇگىنگى تاڭدا ءومىردىڭ بارلىق سالاسى سيفرلاندىرىلىپ جاتقاندا، ارميادا وفيسەرلەردى دايارلاۋدا، ولاردىڭ اقپاراتتاندىرۋدىڭ بارلىق اسپەكتىلەرىن، اۆتوماتتاندىرىلعان باسقارۋ جانە جاساقتاما جۇيەلەرىن مەڭگەرۋىن ەسكەرە وتىرىپ جۇرگىزۋ كەرەك. اسكەري وقۋ ورىندارىندا بۇعان قاجەتتى وقۋ-ادىستەمەلىك بازا بار. بۇل رەتت، جاس وفيسەرلەردىڭ العان بىلىمدەرىن ءىس جۇزىندەگى قىزمەت بارىسىندا كەڭىنەن قولدانۋىنا نۇسقاۋ بەرىلدى.
ءورت ءقاۋىپتى ماۋسىمنىڭ باستالۋىنا قاراي اسكەرلەردە ورتكە قارسى قورعانىس شارالارىن كۇشەيتۋ: ونىڭ ىشىندە وبەكتىلەردىڭ جابدىقتارىن تەكسەرۋ، تەحنيكالىق ءورت ءسوندىرۋ قۇرالدارى مەن كوممۋنيكاسيالار جارامدىلىعىن قامتاماسىز ەتۋ، ورتكە قارسى شتاتتىق بولىمشەلەردى دايىندىققا كەلتىرۋ جانە شتاتتان تىس ءورت ءسوندىرۋ كوماندالارىنىڭ قۇرامىن كۇن سايىن ناقتىلاۋ. وق-دارىلەردى، ججم، قارۋ-جاراق پەن اسكەري تەحنيكانى، ماتەريالدىق قۇرالداردى ساقتاۋ نىساندارىنا ءجىتى نازار اۋدارۋ تاپسىرىلدى.
سەمەي، جاڭعىزتوبە، وسكەمەن گارنيزوندارىنا جۇمىس ساپارىنىڭ ناتيجەسىندە مينيستر اسكەري قىزمەتشىلەر مەن ولاردىڭ وتباسى مۇشەلەرىنىڭ، اسىرەسە شالعاي اسكەري بولىمدەر مەن گارنيزوندارداعىلاردىڭ ءومىر ءسۇرۋى، تۇرمىس جاعدايلارىن تالداۋدى تاپسىردى. ءومىر سۇرۋگە قولايلى جاعداي جاساۋ ءۇشىن دەمالىس ورىندارىن، كوممۋنيكاسيا قىزمەتتەرىن جانە باسقا دا تىرشىلىككە قاجەتتى ماسەلەلەردى قامتاماسىز ەتۋدەگى كەشەندى شارالاردى قابىلداۋدى جۇكتەدى.
باس اسكەري-مەديسينالىق باسقارماسىنىڭ باستىعى اسكەرلەردەگى ەپيدەميولوگيالىق احۋالدى باياندادى. جەكە قۇرامعا ەكپە ەگۋ باستالۋىمەن جاعداي تۇراقتاندى. كوروناۆيرۋس ينفەكسياسىن جۇقتىرۋدىڭ ىلۋدە ءبىر بايقالۋى ەلىمىزدىڭ ءتۇرلى ايماقتارىنان كەلگەن ساربازدارمەن بايلانىستى.
جوسپارعا سايكەس، 15 ماۋسىمنان باستاپ مەرزىمدى قىزمەتتەگى اسكەري قىزمەتشىلەردى زاپاسقا شىعارۋ باستالادى. ءداستۇر بويىنشا، كوكتەمدە ساربازدار ءساۋىر-مامىر ايلارىندا بورىشتارىن وتەۋدەن بوساتىلدى. 2020 جىلى پاندەميا كەزىندە اسكەرگە شاقىرۋدىڭ كەيىنگە قالدىرىلۋىنا وراي جاۋىنگەرلەر زاپاسقا كەشتەۋ شىعارىلۋدا. وسىلايشا، بارلىق «مەرزىمدى قىزمەتتەگىلەر»، قولدانىستاعى زاڭنامادا بەلگىلەنگەندەي، ءدال 12 اي قىزمەت ەتەدى جانە قىزمەت ەتۋ مەرزىمى اياقتالعاننان كەيىن ءوز وڭىرلەرىنە جىبەرىلەدى. اسكەري وقىتىلعان رەزەرۆ رەتىندە ولار جەرگىلىكتى اسكەري باسقارۋ ورگاندارىنا ەسەپكە الىنادى.