بۇل قىزمەتكە يسلامبەك سالجانوۆ سايلاندى.
قازاق ۇلتتىق سپورت تۇرلەرى قاۋىمداستىعىنا جاڭا باسشى كەلدى، دەپ حابارلايدى Almaty-akshamy.kz مادەنيەت جانە سپورت مينيسترلىگىنە سىلتەمە جاساپ.
قازاق ۇلتتىق سپورت تۇرلەرى قاۋىمداستىعىنىڭ جاڭا پرەزيدەنتى بولىپ بەلگىلى كاسىپكەر جانە مەسەنات، Altyn Qyran Foundation قوعامدىق قورى قامقورشىلىق كەڭەسىنىڭ ءتوراعاسى يسلامبەك سالجانوۆ سايلاندى. بۇل تۋرالى قاۋىمداستىق قۇرىلتايشىلارىنىڭ ونلاين جانە وفلاين فورماتتا وتكەن جينالىسى بارىسىندا بەلگىلى بولدى.
ايتا كەتەيىك، قازاق ۇلتتىق سپورت تۇرلەرى قاۋىمداستىعى كوكپار، اۋدارىسپاق، بايگە، جامبى اتۋ، تەڭگە ءىلۋ، توعىزقۇمالاق جانە ت.ب. سپورت تۇرلەرىن بىرىكتىرەدى. بۇعان دەيىن ۇيىمدى بەكبولات تىلەۋحان باسقارعان بولاتىن.
«تاۋەلسىزدىك جىلدارىندا ۇلتتىق سپورت تۇرلەرىن ناسيحاتتاۋ جانە دامىتۋ باعىتىندا ايتارلىقتاي جۇمىس اتقارىلدى. جارىستار رەسپۋبليكالىق جانە حالىقارالىق دەڭگەيدە وتكىزىلدى، قاجەتتى ينفراقۇرىلىم پايدا بولدى. بۇگىندە قاۋىمداستىق الدىندا جاڭا مىندەتتەر تۇر، ولارعا قول جەتكىزۋ ءۇشىن بارلىق تاراپتاردىڭ كۇش-جىگەرىن بىرىكتىرۋ قاجەت»، – دەدى جيىن بارىسىندا مادەنيەت جانە سپورت ءمينيسترى داۋرەن ابايەۆ.
ءوز كەزەگىندە يسلامبەك سالجانوۆ جيىنعا قاتىسۋشىلارعا سەنىم بىلدىرگەنى ءۇشىن العىس ايتتى.
«ءبىزدىڭ قاۋىمداستىق بالالار سپورتىنا ەرەكشە نازار اۋدارۋى قاجەت. بۇعان قوسا، ۇلتتىق سپورت ستاندارتتارىن بەكىتىپ، جاڭا فورماتتاردى ەنگىزۋدى جوسپارلاپ وتىرمىز. ماسەلەن، ۇلتتىق ات سپورتىن جاڭعىرتۋ وتە ماڭىزدى»، – دەدى يسلامبەك سالجانوۆ.
قاتىسۋشىلار قاۋىمداستىقتىڭ بۇرىنعى باسشىلىعى اتقارعان جۇمىستاردى جانە ۇلتتىق سپورت تۇرلەرىن دامىتۋعا قوسقان ۇلەسىن ەرەكشە اتاپ ءوتتى.
سونداي-اق قۇرىلتايشىلاردىڭ جالپى جينالىسى بارىسىندا ۇلتتىق سپورت قاۋىمداستىعىنىڭ 2019-2022 جىلدارى اتقارعان قىزمەتى تۋرالى ەسەپ تىڭدالىپ، بىرلەستىكتىڭ جاڭا باسشىلىق قۇرامى سايلاندى.
