ۇلتتىق قۇرىلتاي وتىرىسىندا مەملەكەت باسشىسى قاسىم-جومارت توقايەۆ كونستيتۋسياعا قاتىستى كاسىبي زاڭگەرلەر تاراپىنان ايتىلعان ۇسىنىستارعا توقتالدى، - دەپ حابارلايدى Aqshamnews.kz
پرەزيدەنتتىڭ ايتۋىنشا، اتا زاڭنىڭ كەيبىر نورمالارىن ناقتىلاي ءتۇسۋ قاجەتتىگى تۋىنداپ وتىر.
مەملەكەت باسشىسى، اسىرەسە، پرەزيدەنت وكىلەتتىگىن بەرۋ جانە سايلاۋ وتكىزۋ ماسەلەسىنە نازار اۋداردى. قازىرگى كونستيتۋسياعا سايكەس، پرەزيدەنت ءوز مىندەتىن اتقارا المايتىنداي جاعداي تۋىنداسا، ونىڭ وكىلەتتىگى قالعان مەرزىمگە سەنات ءتوراعاسىنا بەرىلەتىنى بەلگىلى. ال سەنات ءتوراعاسى دا مەملەكەتتى باسقارۋعا مۇمكىندىگى بولماسا، پرەزيدەنت وكىلەتتىگى زاڭدا بەلگىلەنگەن تارتىپپەن وزگە لاۋازىمدى تۇلعالارعا وتەدى.
پرەزيدەنت بۇل جەردە نەگىزگى ماسەلە «قالعان مەرزىم» ۇعىمىنا تىرەلەتىنىن اتاپ ءوتتى. سەبەبى بۇل مەرزىم التى ايعا دا، ءتىپتى التى جىلعا دەيىن سوزىلۋى مۇمكىن. وسىعان بايلانىستى مەملەكەت باسشىسى كونستيتۋسيادا پرەزيدەنت مەرزىمىنەن بۇرىن قىزمەتىنەن كەتكەن جاعدايدا ەكى ايدىڭ ىشىندە كەزەكتەن تىس سايلاۋ وتكىزۋ تۋرالى نورما ناقتى بەلگىلەنۋى قاجەت ەكەنىن ايتتى.
قاسىم-جومارت توقايەۆتىڭ سوزىنشە، بۇل قادام حالىقارالىق وزىق تاجىريبەگە تولىق ساي كەلەدى. پرەزيدەنت كەز كەلگەن جاعدايدا بيلىككە تەك سايلاۋ ارقىلى، ياعني زاڭدى جولمەن كەلۋى ءتيىس.
– ەلىمىزدىڭ كەز كەلگەن باسشىسى بيلىككە سايلاۋ ارقىلى كەلۋى كەرەك. بۇل – مەن ءۇشىن مىزعىماس ۇستانىم. بۇل نورما كەيىنگى مەملەكەت باسشىلارى ءۇشىن دە وزگەرمەيتىن قاعيدا بولۋى ءتيىس، – دەدى مەملەكەت باسشىسى.
پرەزيدەنتتىڭ بۇل باستاماسى كونستيتۋسيالىق نورمالاردى ناقتىلاپ، ەلدەگى بيلىك ءترانزيتىنىڭ اشىق ءارى زاڭدى تۇردە جۇزەگە اسۋىنا نەگىز بولماق.