ۇلتتىق قۇرىلتاي وتىرىسىندا مەملەكەت باسشىسى قاسىم-جومارت توقايەۆ كونستيتۋسيالىق رەفورمانى ودان ءارى تەرەڭدەتۋ جونىندە ماڭىزدى مالىمدەمە جاسادى. پرەزيدەنتتىڭ ايتۋىنشا، باستاپقىدا پارلامەنتتىك رەفورما اياسىندا اتا زاڭنىڭ 40-قا جۋىق بابىنا وزگەرىس ەنگىزۋ جوسپارلانعان. الايدا جۇمىس بارىسىندا تۇزەتۋلەر كولەمى الدەقايدا اۋقىمدى ەكەنى انىقتالعان.
مەملەكەت باسشىسى 2022 جىلعى كونستيتۋسيالىق رەفورما كەزىندە اتا زاڭنىڭ 33 بابى جاڭارتىلعانىن ەسكە سالدى. ال الداعى وزگەرىستەر بۇدان دا كەڭ اۋقىمدى بولماق.
– ءبىز، شىن مانىندە، جاڭا كونستيتۋسيا قابىلداۋمەن پارا-پار قادام جاساعالى تۇرمىز. سوندىقتان كونستيتۋسيالىق كوميسسيا قۇرۋ تۋرالى شەشىم قابىلدادىم. ارنايى جارلىققا ەرتەڭ قول قويامىن، – دەدى پرەزيدەنت.
قاسىم-جومارت توقايەۆتىڭ ايتۋىنشا، كونستيتۋسيالىق كوميسسيا قۇرامىنا 100-دەن استام ازامات ەنەدى. ولاردىڭ قاتارىندا ۇلتتىق قۇرىلتاي مۇشەلەرى، بەلگىلى زاڭگەرلەر، بۇقارالىق اقپارات قۇرالدارىنىڭ باسشىلارى، ايماقتىق ءماسليحات ءتوراعالارى، قوعامدىق كەڭەس وكىلدەرى جانە وزگە دە بىلىكتى ماماندار بولادى. كوميسسيا جۇمىسىنا كونستيتۋسيالىق سوتتىڭ ءتوراعاسى جەتەكشىلىك ەتەدى.
كوميسسيا بارلىق ۇسىنىستى جان-جاقتى ساراپتاپ، قورىتىپ، ناقتى كونستيتۋسيالىق وزگەرىستەردىڭ جوباسىن ازىرلەيدى. وسىدان كەيىن جالپىحالىقتىق رەفەرەندۋم وتكىزىلەتىن ۋاقىت بەلگىلەنبەك.
سونىمەن قاتار مەملەكەت باسشىسى الەمدەگى كۇردەلى گەوساياسي جاعدايعا قاراماستان، قازاقستاندا سوڭعى جىلدارى تۇبەگەيلى وزگەرىستەر جۇزەگە اسىرىلعانىن اتاپ ءوتتى.
– 2022 جىلعى كونستيتۋسيالىق رەفورماعا جانە اتوم ەلەكتر ستانسياسىن سالۋعا قاتىستى رەفەرەندۋم كەزىندە حالقىمىزدىڭ باسىم كوپشىلىگى مەنى قولدادى. مەن ءاربىر شەشىمدى ەلگە قاجەتتىگى تۇرعىسىنان مۇقيات سارالاپ قابىلدايمىن، – دەدى قاسىم-جومارت توقايەۆ.
پرەزيدەنت ءۇشىن ازاماتتاردىڭ ءال-اۋقاتىن ارتتىرۋعا باعىتتالعان ناقتى جۇمىستاردىڭ بارىنەن ماڭىزدى ەكەنىن جەتكىزدى. ونىڭ ايتۋىنشا، حالىقتىڭ قامى، ۇلت پەن مەملەكەتتىڭ مۇددەسى – باستى قۇندىلىق.
– الداعى ۋاقىتتا دا ەلىمىزدى دامىتىپ، تاۋەلسىزدىگىمىزدى نىعايتۋ جولىندا بار كۇش-جىگەرىمدى سالامىن. ستراتەگيالىق باعدارىمدى ۇنەمى قولداپ كەلە جاتقان بارشا حالىققا جانە وسى زالدا وتىرعان ەلىمىزدىڭ لايىقتى ازاماتتارىنا شىن جۇرەكتەن ريزاشىلىعىمدى بىلدىرەمىن، – دەدى مەملەكەت باسشىسى.