الماتىدا قالالىق جوسپارلاۋ جانە ۋربانيستيكا باسقارماسىندا ناۋرىز مەرەكەسى ءداستۇرلى تۇردە كونسەرتتىك باعدارلامامەن اتالىپ ءوتتى.
كوكتەمنىڭ شۋاقتى مەرەكەسى ناۋرىز مەيرامىنىڭ قارساڭىندا باسقارما قىزمەتكەرلەرى كۇندەلىكتى كەڭسە كيىمدەرىن ۇلتتىق كيىمدەرگە اۋىستىرىپ الماتىلىقتار مەن ارىپتەستەرىن جىلى جۇزبەن جانە «پاراسات» جاس دومبىراشىلار ءانسامبلىنىڭ قاتىسۋىمەن ۇيىمداستىرىلعان مەرەكەلىك باعدارلامامەن قارسى الدى. كۇيشىلەردىڭ ورىنداۋىندا حالىق اۋەندەرى، ونىڭ ىشىندە اتاقتى كۇيلەر وينالدى، دەپ حابارلايدى اlmaty-akshamy.kz.
«ناۋرىزناما» جوسپارى اياسىندا وتكەن شارادا جاستاردان قۇرالعان دومبىراشىلار جينالىپ، قازاق كۇيلەرىن ورىندادى. «اداي»، «ەركە سىلقىم»، «بالبىراۋىن» سياقتى تانىمال تۋىندىلار شەرتىلدى.
«ناۋرىز مەيرامى بەيبىتشىلىك پەن ىزگىلىكتى، جاڭا ءومىردى، تابيعاتتىڭ ويانۋىن، رۋحاني ورلەۋدى بەينەلەيدى. ەجەلدەن ناۋرىز مەيرامى زامان مەن ۇرپاقتار اراسىنداعى دوستىقتى، ءوزارا سىيلاستىقتى جانە ۇزدىكسىز بايلانىستى نىعايتۋعا ىقپالىن تيگىزەتىن جارىق كۇن رەتىندە قاستەرلەنىپ كەلەدى»، -دەيدى باسقارما باسشىسىنىڭ ورىنباسارى ەركەبۇلان سەمبايەۆ.
كەڭ دالانى مەكەن ەتكەن قازاق جۇرتىنىڭ ەڭ اياۋلى دا قاسيەتتى مۋزىكالىق اسپابى دومبىرانىڭ بىردە كۇمبىرلەگەن، بىردە شەرتىلگەن ويلى دىبىسى قۇلاققا جاعىمدى، جۇرەككە جاقىن ەستىلدى. ونىڭ كۇمىستەي سىڭعىرلاعان ءۇنى تالاي سىردىڭ باسىن قايىردى.
ەسكە سالا كەتەيىك، بيىل ءاز-ناۋرىز مەرەكەسى جىلداعىدان ەرەكشە وتۋدە. ءبىر قۋانارلىعى، مۇنداي شارالار كەلەشەك ۇرپاقتى ۇلتتىق قۇندىلىقتارىمىزدى قادىرلەۋگە تاربيەلەيدى. ەندەشە اتادان-بالاعا مۇرا بولىپ كەلە جاتقان ۇلتتىق قۇندىلىقتارىمىزدى ءالى دە جانداندىرىپ، مارتەبەسىن اسىرا بەرۋىمىز كەرەك.