2024 جىلعى 22 قاراشادا جامبىل اتىنداعى قازاق مەملەكەتتىك فيلارمونياسىندا قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ 90 جىلدىق مەرەيتويى اياسىندا كۇيشى، ديريجەر، «قازاقستاننىڭ ەڭبەك سىڭىرگەن قايراتكەرى»، مەملەكەتتىك «دارىن» جاستار سىيلىعىنىڭ يەگەرى، تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى ارمان جۇدەبايەۆتىڭ شىعارماشىلىق كەشى ءوتتى، دەپ حابارلايدى aqshamnews.kz
كەشتىڭ شىمىلدىعى مۇقان تولەبايەۆتىڭ «ءبىرجان-سارا» وپەراسىنان ۇزىندىمەن اشىلدى. بۇل تۋىندىنى قۇرمانعازى اتىنداعى وركەستر مەن باقىتجان بايقاداموۆ اتىنداعى مەملەكەتتىك حور كاپەللاسى ورىنداپ، كورەرمەندەرگە كەرەمەت اسەر سىيلادى.
سالتاناتتى شارادا ەلدىڭ تانىمال تۇلعالارى مەن ونەر جاناشىرلارى قاتىسىپ، ارمان جۇدەبايەۆتىڭ ۇلتتىق ونەردى دامىتۋداعى ەڭبەگىن جوعارى باعالادى. قازاقستان رەسپۋبليكاسى پرەزيدەنتىنىڭ كەڭەسشىسى مالىك وتاربايەۆ ارمان جۇدەبايەۆقا مەملەكەت باسشىسىنىڭ قۇرمەت گراموتاسىن تابىستاسا، پارلامەنت دەپۋتاتتارى ماۋلەن اشىمبايەۆ پەن ەرلان قوشانوۆتىڭ قۇتتىقتاۋ سوزدەرى جەتكىزىلدى. سونىمەن قاتار، اقتوتى رايىمقۇلوۆا، ەربول مىرزابوسىنوۆ، دارحان جازىقبايەۆ سىندى لاۋازىمدى تۇلعالار كەشتىڭ ەرەكشە ماڭىزدىلىعىن اتاپ ءوتتى.
كەش بارىسىندا ۇلتتىق جانە الەمدىك كلاسسيكالىق مۋزىكانىڭ ۇزدىك تۋىندىلارى شىرقالدى. قۇرمانعازىنىڭ «سارىارقا»، نۇرعيسا تىلەندييەۆتىڭ «ماحامبەت پوەماسى»، ميحايل گلينكانىڭ «رۋسلان مەن ليۋدميلا» وپەراسىنان ۋۆەرتيۋرا، پەتر چايكوۆسكييدىڭ «پلياسكا»، سونداي-اق ارمان جۇدەبايەۆتىڭ اۆتورلىق كۇيى «جەتىسۋ» ورىندالدى.
ارمان جۇدەبايەۆ ديريجەر رەتىندە ءوز شەبەرلىگىن پاش ەتىپ، كورەرمەندەرمەن ەرەكشە بايلانىس ورناتتى. ونىڭ زال تولى كورەرمەندەردىڭ شاپالاقتارىن ريتمگە سايكەستەندىرۋى كەشكە ەرەكشە سەرپىن بەردى.
كەشتىڭ ايرىقشا ەرەكشەلىگى – مۋزىكالىق جانرلاردىڭ ۇيلەسىمدىلىگى مەن ورىنداۋشىلاردىڭ كاسىبي شەبەرلىگى بولدى. كونسەرتتە قازاقستاننىڭ حالىق ءارتىسى رامازان ستامعازييەۆ، مەملەكەتتىك سىيلىق لاۋرەاتى تالعات كۇزەمبايەۆ، كۇيشىلەر نۇركەن اشيروۆ سىندى ونەرپازدار ونەر كورسەتتى.
كەشتىڭ فينالىندا قۇرمانعازىنىڭ «سارىارقا» كۇيى ورىندالىپ، كورەرمەندەردىڭ ەرەكشە ىقىلاسىنا بولەندى.
ارمان جۇدەبايەۆتىڭ شىعارماشىلىق كەشى ۇلتتىق مۋزىكانىڭ رۋحىن اسقاقتاتقان، ونەر سۇيەر قاۋىمدى رۋحاني بايىتقان ايتۋلى مادەني شاراعا اينالدى.