گەرمانيادا ءاۆتووندىرىس سالاسىندا داعدارىس ورىن الدى. ەسسەندەگى CAT Automobillogistik لوگيستيكالىق الاڭىندا 6 مىڭنان استام جاڭا كولىك جيناقتالعان، ءبىراق ولار ءۇشىن ساتىپ الۋشى تابىلماي جاتىر. ولاردىڭ اراسىندا Volkswagen جانە Audi برەندتەرىنىڭ قىمبات مودەلدەرى، سونداي-اق ەلەكتر كولىكتەرءى بار، دەپ حابارلايدى aqshamnews.kz
بۇل كولىكتەردىڭ جالپى قۇنى كەم دەگەندە 300 ميلليون ەۋروعا باعالانادى. قىزمەتكەرلەردىڭ ايتۋىنشا، كولىكتەر جارتى جىلدان استام ۋاقىت بويى تۇرىپ قالعان، ال كەيبىرى ءبىر جىلدان اسا ۋاقىت بويى تۇر.
الاڭدا جۇمىس ىستەيتىن قىزمەتكەرلەردىڭ ءبىرى BILD باسىلىمىنا: «مەن بۇنداي جاعدايدى بۇرىن-سوڭدى كورمەگەنمىن، مەن وسىندا ون جىلدان استام جۇمىس ىستەيمىن. كولىكتەردى الىپ كەلەدى، ءبىراق ولاردان ەشكىم شىقپايدى» دەپ مالىمدەدى.
داعدارىستىڭ نەگىزگى سەبەپتەرى رەتىندە اۆتوكولىكتەردىڭ جوعارى باعاسى مەن ەلەكتر كولىكتەرى ءۇشىن زاريادتاۋ ستانسيالارىنىڭ ينفراقۇرىلىمىنىڭ جەتىسپەۋشىلىگى اتالادى.
«ادامدار ەلەكترواۆتوموبيلدەر ءۇشىن وسىنداي قىمبات اقشا تولەۋگە دايىن ەمەس، ال زاريادتاۋ ستانسيالارىنىڭ دامىماۋى مەن ءجۇرىس قاشىقتىعىنىڭ شەكتەۋلەرى ساتىپ الۋشىلاردى تارتىپ المايدى»، — دەپ اتاپ ءوتتى لوگيستيكالىق الاڭنىڭ قىزمەتكەرى.
ساراپشىلار جاڭا كولىكتەرگە دەگەن سۇرانىستىڭ گەرمانيادا تومەندەۋدى جالعاستىرىپ جاتقانىن راستاپ وتىر. بۇل جاعداي اۆتوكولىك وندىرۋشىلەرىنە كەرى اسەرىن تيگىزۋدە: Ford سياقتى كومپانيالار جۇمىس كۇندەرىن قىسقارتۋعا جانە قىزمەتكەرلەرىن جۇمىستان شىعارۋعا ءماجبۇر. الايدا، سۇرانىستىڭ تومەندەۋى ساتىپ الۋشىلارعا پايدا اكەلۋى مۇمكىن، ويتكەنى وندىرۋشىلەر تۇرىپ قالعان كولىكتەرىنەن قۇتىلۋ ءۇشىن ۇلكەن جەڭىلدىكتەر ۇسىنا باستادى.
اۆتوكولىك ساراپشىسى فرانك شۆوپە جىلدىڭ سوڭىنا دەيىن اۆتوكولىك وندىرۋشىلەرى وزدەرىنىڭ ساتىلىم كورسەتكىشتەرىن جاقسارتۋعا تىرىسادى، بۇل ءوز كەزەگىندە ۇلكەن جەڭىلدىكتەرگە اكەلەدى دەپ بولجايدى. دەگەنمەن، داعدارىس تەرەڭدەي تۇسۋدە، ال تومەندەگەن سۇرانىس جاعدايىندا ۇزاق مەرزىمدى شەشىمدەر تابۋ بارعان سايىن قيىنداپ بارادى.