مەكسيكادا وتكەن «الەم ارۋى» حالىقارالىق بايقاۋىندا قازاقستان اتىنان ونەر كورسەتكەن مادينا المۇحانوۆانىڭ قاتىسۋىمەن وڭىرلىك كوممۋنيكاسيالار قىزمەتىنىڭ الاڭىندا باسپا ءسوز كونفەرەنسياسى ءوتتى. ول بايقاۋعا قاتىسۋ بارىسىندا العان اسەرلەرى مەن تاجىريبەسى جايلى اڭگىمەلەپ، ءوز ويىمەن ءبولىستى.
«وسىنداي اۋقىمدى بايقاۋدا ءوز ەلىڭدى تانىستىرۋ – مەن ءۇشىن زور قۇرمەت پەن جاۋاپكەرشىلىك. قازاقستاننىڭ مادەني بايلىعىن كورسەتىپ، ەلىمىزدىڭ بىرەگەيلىگىن تانىتا العانىما قۋانىشتىمىن»، – دەدى ول.
قازاقستان اتىنان قاتىسقان ارۋ بايقاۋعا الەمنىڭ 125 ەلىنەن قاتىسۋشىلار كەلگەنىن جانە تىعىز كەستەنىڭ ماڭىزدى سىناق بولعانىن ايتتى.
«العاشقى ءتورت كۇندە تىركەۋ مەن فوتوسەسسيالار ءوتتى. ۇيقىعا ۋاقىت وتە از ءبولىندى، كەزەگىمىزدى كۇتۋگە كوپ ۋاقىت جۇمسالدى. كەيىن باستى فينالعا دايىندىق باستالدى»، – دەپ ءبولىستى مادينا.
ول اسىرەسە ۇلتتىق كوستيۋمدەر مەن اشەكەيلەردى تانىستىرۋ كەزەڭىنەن ەرەكشە اسەر العانىن اتاپ ءوتتى. قازاقستاندىق ۇلتتىق زەرگەرلىك بۇيىمدار كوپتەگەن قاتىسۋشىلاردىڭ قىزىعۋشىلىعىن تۋدىرعان.
«مەن وزىممەن بىرگە شەكەلىك پەن شاشباۋ اكەلدىم. ءبىزدىڭ زەرگەرلىك بۇيىمدارىمىز شەتەلدىك قاتىسۋشىلاردىڭ نازارىن بىردەن اۋداردى. ولار بۇل اشەكەيلەردىڭ ماعىناسى تۋرالى سۇراپ، قىزىعۋشىلىق تانىتتى. سونىمەن قاتار، مەن قازاقستاندىق شوكولاد سىيلىقتارىن الا باردىم، بارلىعى ونىڭ دامىنە ءتانتى بولدى»، – دەدى ول.
مادينا بۇل بايقاۋعا قاتىسۋ وعان ءوزىن-وزى دامىتۋدا جاڭا كوكجيەكتەر اشىپ، قۇندى تاجىريبە بەرگەنىن ايتتى.
«بۇل بايقاۋ مەنىڭ وزىمە دەگەن سەنىمىمدى ارتتىردى. وسىنداي دەڭگەيدەگى كونكۋرسقا قاتىسقاننان كەيىن ىشتەي ءبىر كۇش پايدا بولدى. ەندى مەن ودان دا ۇلكەن جەتىستىكتەرگە جەتۋگە بولاتىنىن ءتۇسىندىم»، – دەدى ول.
«قازاقستان ارۋى» بايقاۋىنىڭ PR-ديرەكتورى گۇلىم سوۆەتقان «الەم ارۋى» كونكۋرسىنىڭ سۇلۋلىق سالاسىنداعى بەدەلدى ءىس-شارالاردىڭ ءبىرى بولىپ قالا بەرەتىنىن اتاپ ءوتتى. الايدا، بيىل قازاقستان مەن ورتالىق ازيا ەلدەرىنە جەتكىلىكتى نازار اۋدارىلماعاندىقتان، ەلىمىزدىڭ وكىلدەرى توپتارعا ەنە المادى.
ۇيىمداستىرۋشىلار كەز كەلگەن بايقاۋدا جەڭىستەر مەن جەڭىلىستەر بولاتىنىن اتاپ ءوتىپ، بولاشاقتا بايقاۋدى جەتىلدىرۋ ءۇشىن ۇسىنىستاردى ەسكەرۋگە دايىن ەكەندىكتەرىن ءبىلدىردى.