ق ر ۇلتتىق مۋزەيىندە تانىمال بريتاندىق ءمۇسىنشى يۋنۋس سافاردياردىڭ «ەكىنشى ورلەۋ» اتتى كورمەسى ءوتىپ جاتىر.
استاناعا ارنايى كورمە ءۇشىن لوندوننان 2 توننا ەكسپونات جەتكىزىلگەن. ونىڭ ىشىندە مەتالل ينستاللياسيالار مەن مۇسىندەر، كەنەپ سۋرەتتەر، بەينەپاننولار بار، دەپ حابارلايدى aqshamnews.kz مادەنيەت جانە اقپارات مينيسترلىگىنە سىلتەمە جاساپ.
«مەنىڭ شىعارماشىلىعىم — الەمنىڭ شەكسىز ترانسفورماسياسىنىڭ كورىنىسى. كورەرمەن ەسكى فورمالاردىڭ جويىلعانىن، جاڭا فورمالاردىڭ پايدا بولىپ، ءتىپتى ەرەكشە دۇنيەگە ۇلاسىپ جاتقانىن كورسە دەيمىن»، — دەيدى كورمە اۆتورى.
يۋنۋس سافارديار — كورولدىك كوركەمسۋرەت اكادەمياسىنىڭ مۇشەسى. ونىڭ كورمەلەرى مەن تۋىندىلارىنىڭ اۋكسيوندارى 1986 جىلدان بەرى وتكىزىلىپ كەلەدى. ءمۇسىنشىنىڭ شىعارمالارى نيۋ-يورك، لوندون، فلوريدا، سانكت-پەتەربۋرگ جانە باسقا دا قالالارداعى مۋزەيلەر مەن جەكە كوللەكسيالاردا ساقتاۋلى. بىرنەشە جۇمىسى ەڭ كونە اۋكسيونداردىڭ ءبىرى Sotheby’s-تە ساتىلىپ، ال «ويانۋ» اتتى ءمۇسىنى لوندونداعى ايگىلى Regent’s Park-كە كورىك بەرىپ تۇر.
ۇلتتىق مۋزەيدە كورمەنى 3،5 مىڭنان استام ادام تاماشالاعان. ەكسپوزيسيا مۋزەيدىڭ 5-قاباتىنداعى كورمە زالىندا ۇسىنىلعان. كورمە 2024 جىلدىڭ 17 قاراشاسىنا دەيىن جالعاسادى.