الماتىدا قاراسۋ كولىنىڭ تۇبىنەن 53 توننا قوقىس شىعارىلدى
الماتى قالاسىنىڭ اكىمى ەربولات دوسايەۆ الاتاۋ اۋدانىنداعى جۇمىس ساپارى بارىسىندا قاراسۋ كولىن تازارتۋ جۇمىستارىنىڭ ناتيجەسىمەن تانىستى، دەپ حابارلايدى aqshamnews.kz
قاراسۋ شاعىن اۋدانىنىڭ تۇرعىندارى كولدى تازارتۋ تۋرالى قالا اكىمىنەن كومەك سۇراعان بولاتىن. ەربولات دوسايەۆتىڭ تاپسىرماسىمەن بالقاش-الاكول باسسەيندىك ينسپەكسياسىمەن كەلىسىلگەن جوبا ازىرلەندى. سۋ قويماسىن مەحانيكالىق تازالاۋدى مەردىگەر – «TOLAGAI-2050» جشس-2023 جىلدىڭ ناۋرىز ايىندا باستاپ، قىركۇيەكتە اياقتاۋعا ءتيىس ەدى. الايدا جوبانىڭ اياقتالۋ مەرزىمى بيىلعى جىلدىڭ تامىزىنا اۋىستىرىلدى، سەبەبى تۇبىندەگى لايدىڭ قالىڭدىعى جوبالاۋ كەزىندە بولجانعاننان بىرنەشە ەسە كوپ بولىپ شىقتى (30 سم ورنىنا 100-120 سم). سونىمەن قاتار، اۋىر تەحنيكانىڭ ءوتۋى ءۇشىن كولدىڭ تۇبىنەن ۋاقىتشا جول سالۋ قاجەتتىلىگى دە مەرزىمگە اسەر ەتتى. باستاپقىدا تازارتۋ جۇمىستارىن توپىراق قاتقان قىس مەزگىلىندە جۇرگىزۋ جوسپارلانعان ەدى.
كولدى تازارتۋ جۇمىستارى اياقتالعان سوڭ ۋاقىتشا جول لايمەن بىرگە شىعارىلدى. ايتا كەتۋ كەرەك، بۇل جۇمىس توعان تاريحىندا العاش رەت جۇرگىزىلدى. سونىڭ ناتيجەسىندە كولدىڭ تۇبىنەن 53 توننا قوقىس جانە 10 مىڭ تەكشە مەتر لاي شوگىندىسى شىعارىلدى. سونىمەن قاتار، سۋ دەڭگەيىن رەتتەۋ جانە ونىڭ جاعاعا اسىپ كەتۋىن بولدىرماۋ ءۇشىن سۋ اعىزۋ قۇرىلىستارى سالىندى.
جوبا قالالىقتاردىڭ شاعىمدانعان بىرنەشە ماسەلەسىن شەشۋگە مۇمكىندىك بەردى: ءبىرىنشى كەزەكتە، تازارتۋ ارقىلى سۋ ايدىنىنىڭ ەكولوگيالىق تەپە-تەڭدىگى مەن بيولوگيالىق الۋان تۇرلىلىگى قالپىنا كەلەدى. كول تۇرعىندار مەن قالا قوناقتارى ءۇشىن قايتادان دەمالۋعا ىڭعايلى ورىنعا اينالادى.
ساپار بارىسىندا قاراسۋ شاعىن اۋدانىنىڭ تۇرعىندارى كولدى تازارتۋ جۇمىستارى ءۇشىن العىس ءبىلدىرىپ، اكىمنەن سۋ قويماسى ماڭىندا جاياۋ جۇرگىنشىلەر ايماعىن سالۋدى ءوتىندى. بۇعان جاۋاپ بەرگەن الماتى اكىمى ەربولات دوسايەۆ ءوزىنىڭ تاپسىرماسىمەن سپورتپەن شۇعىلدانۋعا ارنالعان سەرۋەندەۋ جانە بەلسەندى دەمالىس ايماقتارىن سالۋدى قامتيتىن كورىكتەندىرۋ جوباسى ازىرلەنەتىنىن ايتتى.
