الماتى قالاسىنىڭ مەكتەپتەرى اراسىندا «ەكولوگيالىق مادەنيەتتى تاربيەلەۋ – وقۋشىلارعا ماڭىزدى فاكتور رەتىندە قۇندىلىقتى قالىپتاستىرۋ»تاقىرىبىندا سەمينار ءوتتى.
«الماتى – ءبىزدىڭ ورتاق ءۇيىمىز» ناۋقانى اياسىندا وتكەن سەمينار تۇركسىب اۋدانىنداعى №142 جالپى ءبىلىم بەرەتىن مەكتەپتە ۇيىمداستىرىلدى. وعان 100-دەن استام مەكتەپ ديرەكتورى، ادىسكەرلەر، ديرەكتوردىڭ تاربيە ءىسى جونىندەگى ورىنباسارلارى قاتىستى.
باستى ماقساتى – قالالىق ينفراقۇرىلىمعا ۇقىپتى قاراۋ، وقۋشىلاردى جوعارى ازاماتتىق جاۋاپكەرشىلىك پەن ەكولوگيالىق مادەنيەتكە تاربيەلەۋ، جەكە ەكولوگيالىق باستامالاردى قولداۋ جانە ولاردى ىسكە اسىرۋ ءۇشىن جاعداي جاساۋ.
«قالالىق سەمينار «الماتى – ءبىزدىڭ ورتاق ءۇيىمىز» ايلىعىنا ارنالادى. قالالىق ادىستەمەلىك ورتالىق ماماندارى، سەگىز اۋدانداعى مەكتەپتەردىڭ باسشىلارى جانە تاربيە ءىسى جونىندەگى ورىنباسارلار قاتىسىپ وتىر. ءىس-شارامىزدىڭ ماڭىزدى تاقىرىبى – ەكولوگيا. باستاۋىش سىنىپ مۇعالىمدەرى مەن 5–11-سىنىپ جەتەكشىلەرى مەن ءپان مۇعالىمدەرى ۇيىمداستىردى. بۇل قالالىق سەمينارعا 100-گە جۋىق وقۋشى قاتىسىپ، ونەر كورسەتتى. اكسيا اياسىندا وقۋشىلاردىڭ قولونەرىن جيناقتاپ، كورمە ۇيىمداستىردىق. الماتى قالاسى ءبىلىم باسقارماسىنىڭ قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنان جوسپار بويىنشا وسىنداي سەميناردى ءبىزدىڭ مەكتەپتە وتكىزۋ جونىندە ۇسىنىس ءتۇستى. قورشاعان ورتاعا قامقورلىق جاساپ، قورعاۋ – ءار ادامنىڭ ازاماتتىق مىندەتى دەپ ويلايمىز»، – دەدى №142 جالپى ءبىلىم بەرەتىن مەكتەپ ديرەكتورىنىڭ مىندەتىن اتقارۋشى گۇلشات ەربولات قىزى.
«الماتى قالاسى مەكتەپتەرىندە ءتۇرلى ەكولوگيالىق ءىس-شارالار ءوتىپ جاتىر. ءبىزدىڭ مەكتەپتە دە جالپىقالالىق ناۋقان شەڭبەرىندە سەمينار ءوتتى. ۇلتتىق مۇددە – قوعامعا قاجەتتى قۇندىلىق. ناۋرىزباي، الاتاۋ، مەدەۋ جانە ءوزىمىزدىڭ تۇركسىب اۋدانىنان ارىپتەستەرىمىز قاتىسىپ، ەكولوگيا مەن ناۋقان تۋرالى مول ماعۇلمات الدى. وقۋشىلار، اتا-انالار جانە ۇستازدار – وسى ۇشتىك وداق اتسالىسقان اۋقىمدى شارا ويداعىداي ءوتتى دەپ ويلايمىن. تۋعان قالامىزدى تازا ۇستاۋعا، ەكولوگيامىزدى قورعاۋعا ۇلەس قوسساق دەگەن ماقساتىمىز بولدى. بالاعا ەكولوگيالىق ءبىلىم مەن تاربيە جايلى ۇعىمدى اتا-انامەن قاتار، ۇستاز دا تۇسىندىرە ءبىلۋى كەرەك. قورشاعان ورتاسىن تازا ۇستاعان وقۋشىدا جاۋاپكەرشىلىك، ادامگەرشىلىك جانە ىزگىلىك قاسيەتتەرى بولادى»، - دەدى №142 جالپى ءبىلىم بەرەتىن مەكتەپ ديرەكتورىنىڭ تاربيە ءىسى جونىندەگى ورىنباسارى اراي تۋحانوۆا.