مينيستر بۇل ماسەلەنى ءوز باقىلاۋىنا الادى.
ق ر مادەنيەت جانە سپورت ءمينيسترى داۋرەن ابايەۆ مادەنيەت سالاسىنداعى قىزمەتكەرلەردىڭ الەۋمەتتىك قامتىلۋىن جاقسارتۋعا ۋادە بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ارينە، سالاداعى ەڭ وزەكتى ماسەلەلەردىڭ ءبىرى – مادەنيەت ۇيىمدارى قىزمەتكەرلەرىنىڭ الەۋمەتتىك پاكەتى. «ۇلتتىق» مارتەبەسى بار مادەنيەت ۇيىمدارى قىزمەتكەرلەرىنىڭ لاۋازىمدىق جالاقىلارىنا 1،75 كوەففيسيەنتى تۇرىندە قوسىمشا اقىلار مەن ۇستەمەاقىلار ازىرلەۋ قاجەت»، - دەدى داۋرەن ابايەۆ ۆەدومستۆونىڭ كەڭەيتىلگەن القا وتىرىسىندا.
ءمينيستردىڭ ايتۋىنشا، شىعارماشىلىق جوعارى وقۋ ورىندارىنىڭ پروفەسسور-وقىتۋشىلار قۇرامى مەن كونسەرتمەيستەرلەرىنىڭ جالاقى مولشەرىنە دە نازار اۋدارۋ قاجەت.
«بۇل ماسەلەنى مەن ءوز باقىلاۋىما الامىن. وسى كۇندەرى مەن كەزدەستىرگەن كوپتەگەن وقىتۋشىلار، ءتىپتى ەڭ قيىن 90-شى جىلدارى دا ءوز ماماندىقتارىن تاستاماعان. سولاردىڭ ارقاسىندا مادەنيەت پەن ونەردە ۇرپاقتاردىڭ اراسى الشاقتامادى»، - دەپ اتاپ ءوتتى ۆەدومستۆو باسشىسى.