«اۋىل» پارتياسىنان قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي دايرابايەۆ «DANMARD» ج ش س ەڭبەك ۇجىمىمەن كەزدەستى. كەزدەسۋ بارىسىندا كانديدات ولارمەن ەڭبەك ادامىنىڭ ءرولىن ارتتىرۋ جانە ەلدەگى جەڭىل ونەركاسىپتىڭ جاي-كۇيى ماسەلەلەرىن تالقىلادى.
«DANMARD» ج ش س اسكەر مەن ءورت سوندىرۋشىلەرگە كيىم تىگەدى. كاسىپورىن بۇگىندە ءوز ءوندىرىسىن دامىتۋدا جانە جەتىلدىرۋدە. كەزدەسۋدە كانديدات ءوزىنىڭ سايلاۋالدى ناۋقانى اياسىندا ەڭبەك ادامىنىڭ ءرولى مەن ماڭىزدىلىعىن ارتتىرۋعا قول جەتكىزۋدى جوسپارلاپ وتىرعانىن ايتتى.
جيگۋلي دايرابايەۆ سونىمەن قاتار، مەملەكەتتىك تاپسىرىستاردىڭ ءادىل ءبولىنۋى ءتيىس ەكەنىنە توقتالىپ، ۇلتتىق جانە كۆازيمەملەكەتتىك كومپانيالار تەك يمپورتتىق تاۋارلاردى ساتىپ الاتىنىن اتاپ ءوتتى.
«ەلىمىزدە جەڭىل ونەركاسىپ، ونىمەن اينالىساتىن جەكە ءبولىم جوق. بۇل ۇلكەن قاتەلىك. ەكونوميكانىڭ وسى سالاسىن جانداندىرۋ جانە دامىتۋ ءۇشىن ۇلتتىق كومپانيالار وتاندىق ءوندىرىستى قولداۋى كەرەك. مىسالى، جەڭىل ونەركاسىپ ونىمدەرىن ۇلكەن كولەمدە ساتىپ الا الاتىن قتج-نىڭ بۇيرەگى يمپورتقا بۇرىپ تۇرادى. نارىقتىق ەكونوميكانىڭ ءوز زاڭدىلىعى بار، تۇسىنەمىز، ءبىراق بىزدە وتاندىق ونەركاسىپ باسىمدىققا يە بولۋى كەرەك. سوندىقتان مەن بارلىق قازاقستاندىقتى ءوز ونىمدەرىمىزدى قولداۋعا شاقىرامىن»، – دەدى كانديدات.
سونىمەن قاتار جيگۋلي دايرابايەۆ وڭىرلەردە جەڭىل ونەركاسىپتى دامىتۋدى ۇسىندى.
«وڭىرلەردە، اسىرەسە اۋىلدىق ەلدى مەكەندەردە جۇمىس كۇشى مول. اۋىلداردا جەڭىل ونەركاسىپ كاسىپورىندارىن دامىتا وتىرىپ، ءبىز كوپتەگەن ماسەلەنى شەشىپ، اۋىل تۇرعىندارىن جۇمىسپەن قامتاماسىز ەتەر ەدىك»، – دەدى جيگۋلي دايرابايەۆ.
كەزدەسۋ سوڭىندا كانديدات قىزمەتكەرلەردىڭ ءوزىنىڭ سايلاۋالدى باعدارلاماسى تۋرالى قويعان سۇراقتارىنا جاۋاپ بەردى.