الماتى پوليسياسى جالعان تۇبىرتەكپەن ساتۋشىلاردى الداعان كۇدىكتىلەردى ۇستادى

بۇل قىلمىسقا قاتىسى بار كۇدىكتىلەردىڭ ءبىرى بۇرىن دا وسىنداي ءىسى ءۇشىن سوتتى بولعان. 

قىلمىستىق توپتى اۋەزوۆ اۋدانىنىڭ پوليسەيلەرى قۇرىقتادى، Almaty-akshamy.kz Polisia.kz-كە سىلتەمە جاساپ. 

 «ءار قاتىسۋشىعا جەكە ءرول تاعايىندالدى: بىرەۋى ساتۋشىلارمەن سويلەستى، ەكىنشىسى جالعان تۇبىرتەك دايىندادى، ءۇشىنشىسى – جۇرگىزۋشى، ال قىز سەنىمدىلىك ءۇشىن جاندارىندا بولدى. 22 جاستاعى و.ەسىمدى ازامات جانە ونىڭ سىبايلاسى 29 جاستاعى م.ەسىمدى ازامات ينتەرنەتتەن IPhone تەلەفوندارىن ساتۋ تۋرالى حابارلاندىرۋلاردى تاۋىپ العان. كورسەتىلگەن سوماعا الدىن الا جالعان ونلاين اۋدارىم تۋرالى تۇبىرتەك دايىنداپ، ساتۋشىلارمەن كەزدەسۋ ۇيىمداستىرعان. ياعني، قاسكوي كەزدەسۋگە دايىندالىپ كەلگەن. ولار قىلمىستىق جولمەن الىنعان ۇيالى تەلەفونداردى لومباردقا وتكىزگەن نەمەسە ساتىپ جىبەرىپ وتىرعان. ال تۇسكەن قاراجاتتى ءوز قالاۋلارى بويىنشا پايدالانعان»، – دەيدى اۋەزوۆ اۋداندىق پب-عا قاراستى پوليسيا ءبولىمىنىڭ باستىعى ەدىلحان بايعارايەۆ.

پوليسيا قىزمەتكەرلەرى جەدەل-ىزدەستىرۋ ءىس-شارالارى بارىسىندا ءتورت كۇدىكتىنى ۇستادى. ولار 5 قىلمىس جاساعاندارىن مويىندادى. 

«قىلمىستىق ءىس ق ر قك-نىڭ 190-بابى 3-بولىگىنە سايكەس، سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى. ءقازىر تەرگەۋشىلەر دالەلدەمەلەردى پىسىقتاپ جاتىر. ۇستالعانداردىڭ جەكە باسى جالپى قالا بويىنشا بۇرىن جاسالعان وسىعان ۇقساس قىلمىستارعا قاتىسى بار-جوعىنا تەكسەرىلەتىن بولادى»، – دەدى ەدىلحان بايعارايەۆ.

كۇدىكتىلەردىڭ ءبىرى – تجو-دا جۇمىس ىستەيتىن 29 جاستاعى سلەسار، بۇرىن وسىعان ۇقساس قىلمىستار جاساعانى ءۇشىن سوتتى بولعان.