«ۇلتتىق كىتاپ كۇنى» مەرەكەسى اياسىندا وتەتىن ءىس-شارالاردىڭ اپتالىعى باستالدى.
قازاقستان رەسپۋبليكاسىنىڭ مادەنيەت جانە اقپارات مينيسترلىگىنىڭ قولداۋىمەن ق ر ۇلتتىق اكادەميالىق كىتاپحاناسىندا «ۇلت جانە ۇلتتىق كىتاپ» اتتى اشىق ەسىك كۇنى ءوتتى، دەپ حابارلايدى aqshamnews.kz.
ءىس-شارانىڭ ماقساتى – قالامگەر، كىتاپ جانە وقىرمان اراسىنداعى بايلانىستى نىعايتىپ، مادەني-رۋحاني قۇندىلىقتاردى قوعامعا جان-جاقتى ناسيحاتتاۋ، ينتەللەكتۋالدى جاستاردى ىنتالاندىرۋ.
اشىق ەسىك كۇنى اياسىندا كىتاپحاناداعى جاڭارتىلعان كوۆوركينگ ورتالىعىنىڭ سالتاناتتى اشىلۋى ءوتتى. زاماناۋي فورماتتاعى بۇل كەڭىستىك وقىرمانداردىڭ بىرلەسىپ جۇمىس ىستەۋىنە، پىكىر الماسۋىنا، ءبىلىمىن جەتىلدىرۋىنە مۇمكىندىك بەرەدى.
سونداي-اق «كىتاپ – ۇلتتىق قۇندىلىق» اتتى دوڭگەلەك ۇستەل ۇيىمداستىرىلىپ، وتاندىق ادەبيەتتى قولداۋعا باعىتتالعان تاۋەلسىز جوبا — Mecenat.kz ادەبي سىيلىعى تانىستىرىلدى. دوڭگەلەك ۇستەلدە ەستونيا ەلشىسى يااپ ورا، اقىن-دراماتۋرگ بايانعالي ءالىمجانوۆ، پروفەسسور ءاسيما يشانوۆا، جازۋشى نارتاي ساۋدانبەك ۇلى، سىنشى امانگەلدى كەڭشىلىك ۇلى جانە باسقا دا زيالى قاۋىم وكىلدەرى ءسوز سويلەپ، ادەبي شىعارمالار ارقىلى ۇلتتىق ادەبيەتكە قولداۋ كورسەتۋدىڭ ماڭىزىن اتاپ ءوتتى.
سونىمەن قاتار ءىس-شارا اياسىندا ق ر مەملەكەتتىك سىيلىعىنىڭ لاۋرەاتى روزا مۇقانوۆانىڭ «كىتاپ – اقىل نۇرى» اتتى شەبەرلىك ساباعى، «اينادان/زازەركالە» سۋرەت كورمەسى جانە مەكتەپ وقۋشىلارىنا ارنالعان «وزىق وي الاڭى» اتتى book quiz ۇيىمداستىرىلىپ، جۋرناليست مانشۇك شىمىربايدىڭ «Dana. The World Citizen» دەرەكتى ءفيلمى كورسەتىلدى.
«ۇلتتىق كىتاپ» كۇنىنە وراي ەلىمىزدىڭ بارلىق وڭىرىندە اشىق ەسىك كۇندەرى، كىتاپ فەستيۆالدەرى، كورمە-جارمەڭكەلەر، باسپاگەرلەر جانە كىتاپ دۇكەندەرىمەن بىرلەسكەن جوبالار ۇيىمداستىرىلدى. بۇل اكسيالارعا رەسپۋبليكا بويىنشا 25 000-عا جۋىق ادام قاتىستى.
ەستەرىڭىزگە سالا كەتەيىك، 23 ءساۋىر - ۇلتتىق كىتاپ كۇنى
ول وتكەن جىلى ۇكىمەت قاۋلىسىمەن بەكىتىلدى.
اتالمىش مەرەكە مەملەكەت باسشىسىنىڭ قوعامدا وقۋ مادەنيەتىن قالىپتاستىرۋ ماقساتىندا ءۇشىنشى ۇلتتىق قۇرىلتايدىڭ نەگىزگى سەسسياسىندا بەرگەن تاپسىرماسىنا بايلانىستى بەلگىلەندى.
قاۋلى 2024 جىلعى 16 شىلدەدەن باستاپ قولدانىسقا ەنگىزىلدى.