الماتى قالاسىندا 9-12 ماۋسىم ارالىعىندا كينوجوبالاردى اشىق قورعاۋ ءوتىپ جاتىر.
پيچينگكە ۇلتتىق كينونى قولداۋ مەملەكەتتىك ورتالىعىنىڭ ەكى كەزەڭ بويىنشا ىرىكتەۋىنەن ءساتتى وتكەن 99 جوبا قاتىسۋدا. بارلىق پروسەسس كينو ورتالىعىنىڭ رەسمي YouTube ارناسىندا تىكەلەي ەفيردە كورسەتىلىپ جاتىر، دەپ حابارلايدى aqshamnews.kz مادەنيەت جانە اقپارات مينيسترلىگىنە سىلتەمە جاساپ.
ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسى قۇرمانبەك ءجۇماعاليدىڭ ايتۋىنشا، مەملەكەت قارجىسىنا تۇسىرىلەتىن فيلمدەردىڭ مازمۇنى مەن ساپاسى جوعارى دەڭگەيدە بولۋى ءتيىس.
ەستەرىڭىزگە سالا كەتەيىك، كونكۋرسقا ءوتىنىم قابىلداۋ 13 ناۋرىزدا اياقتالدى. بيىل كوركەم، دەرەكتى جانە انيماسيالىق فيلم سەكسيالارىندا بارلىعى 444 ءوتىنىم كەلىپ ءتۇستى. ونىڭ ىشىندە 357 جوبا ساراپتاما كەڭەسىنىڭ قاراۋىنا جىبەرىلدى. باعالاۋ ناتيجەسىندە 128 سەناريي مەن سەناريي جوسپارى ەكىنشى كەزەڭگە ءوتتى. قۇجاتتاردىڭ تولىق پاكەتىن تاپسىرعان سوڭ 99 جوبا پيچينگكە جولداما الدى.
ساراپتاما كەڭەسى جوبالاردى باعالاۋ بارىسىندا ءبىرقاتار نەگىزگى كريتەرييلەرگە نازار اۋداردى. اتاپ ايتساق، بەكىتىلگەن باسىم تاقىرىپتارعا ساي بولۋ، سەناريدىڭ تۇجىرىمدامالىق دەڭگەيى، سيۋجەت ديناميكاسى مەن دراماتۋرگيالىق قۇرىلىمى، تەحنيكالىق مازمۇنى جانە كەيىپكەرلەر بەينەسىنىڭ تەرەڭ اشىلۋى ەسكەرىلەتىن بولادى.
ساراپتاما كەڭەسى ىرىكتەگەن جوبالارعا مەملەكەتتىك قارجىلاي قولداۋ كورسەتىلەدى جانە تۋىندى ۇلتتىق فيلم مارتەبەسىنە يە بولادى.