قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ كونسەرتىندە احمەت جۇبانوۆ، سىدىق مۇحامەدجانوۆ، ايتقالي جايىموۆ سىندى تانىمال كومپوزيتورلاردىڭ تۋىندىلارى ورىندالادى، دەپ حابارلايدى aqshamnews.kz.
شارانىڭ ءبىرىنشى بولىمىندە ايتقالي جايىموۆتىڭ وركەسترگە ارنايى جازعان جاڭا تۋىندىسى - «ۋۆەرتيۋرا» تىڭدارمان قاۋىمنىڭ نازارىنا ۇسىنىلماق. بۇل – احمەت جۇبانوۆ پەن قۇرمانعازىنىڭ شىعارمالارىنان ارالاس، يمپروۆيزاتورلىق جاڭا تۋىندى. بۇل تۋرالى قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ باس ديريجەرى، «قۇرمەت» وردەنىنىڭ يەگەرى ابىلاي تىلەپبەرگەن وكق الاڭىندا حابارلادى.
ونىڭ ايتۋىنشا، ەكىنشى بولىمدە «وركەستر ءتۇنى» جوباسىنىڭ جاڭا باعدارلاماسى ۇسىنىلادى. ونەر سۇيەر قاۋىم الەمدىك حيتتەر، ماسەلەن، ۋيتني حيۋستون، ستينگ سىندى بەلگىلى ارتىستەردىڭ اندەرى مەن كينو ساۋندترەكتەرىنىڭ ەلەمەنتتەرىن تاماشالاي الادى.
«كونسەرتتە جەكە ورىنداۋشىلار دا ونەر كورسەتەدى. وركەسترىمىزدىڭ باس كونسەرتمەيسترى، قازاقستاننىڭ ەڭبەك سىڭىرگەن قايراتكەرى باتىرجان مىقتىبايەۆتىڭ جەكە ورىنداۋىندا كۇي تىڭدايمىز، قوبىزشىلار توبىنىڭ كونسەرتمەيستەرى اسەل راحىمجاننىڭ ورىنداۋىندا شىعارما تىڭدايمىز. وزىمىزبەن بىرگە الىپ كەلىپ وتىرعان جەكە سوليستەرىمىز بار. ولاردىڭ ءبىرى – جاس وپەرا ءانشىسى اياجان قۋانشالييەۆا. سونىمەن قاتار قازاقستاننىڭ ەڭبەك سىڭىرگەن قايراتكەرى نۇرلان ونەربايەۆ پەن مەملەكەتتىك «دارىن» جاستار سىيلىعىنىڭ يەگەرى راسۋل جارماعامبەتوۆ، سوليست ەۆگەنيي چاينيكوۆ سىندى ونەرپازدار جەكە ءان ايتىپ، جەكە اسپاپتاردا شىعارما ورىنداپ، ونەرلەرىن كورسەتەدى»، – دەدى سپيكەر.