ماۋسىمنىڭ ءۇشىنشى جەكسەنبىسىندە اتاپ وتىلەتىن مەديسينا قىزمەتكەرلەرىنىڭ كاسىبي مەرەكەسى قارساڭىندا كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆ ينستيتۋتتىڭ قىزمەتى تۋرالى ايتىپ بەردى.
ءبىزدىڭ قىزمەتىمىزدىڭ باسىم باعىتتارى – حالىققا جوعارى تەحنولوگيالىق، مامانداندىرىلعان جانە بىلىكتى مەديسينالىق كومەك كورسەتۋ، قىزمەتىمىزدىڭ نەگىزگى بەيىنى بويىنشا وڭىرلەردىڭ دەنساۋلىق ساقتاۋ ۇيىمدارىنا ۇيىمداستىرۋشىلىق-ادىستەمەلىك جانە پراكتيكالىق كومەك كورسەتۋ. عىلىمي جانە ءبىلىم بەرۋ قىزمەتىمەن اينالىسامىز. ءبىلىم بەرۋ قىزمەتى جوعارى وقۋ ورنىنان كەيىنگى جانە قوسىمشا كاسىپتىك ءبىلىم بەرۋدى، رەزيدەنتۋرا ارقىلى كادرلار دايارلاۋدى قامتيدى. اقپاراتتىق جانە تەلەمەديسينالىق تەحنولوگيالاردى دامىتۋ بويىنشا جۇمىس جاسايمىز.
2024 جىلى ينستيتۋت حالىقارالىق ستاندارتتارعا سايكەستىگىن قايتا راستاعانىن جانە JCI قايتا اككرەديتتەۋ راسىمىنەن وتكەنىن اتاپ وتكىم كەلەدى. JCI اككرەديتاسياسى پاسيەنتتەرگە كلينيكاعا سەنە الاتىنىن كورسەتەدى. ۇلتتىق اككرەديتتەۋدىڭ جوعارى ساناتىن دا تاعى راستادىق. جوعارى ساناتتى راستاۋىمىز - دەنساۋلىق ساقتاۋ جۇيەسىندەگى ۇلتتىق ساپا ستاندارتتارىن ساقتاي وتىرىپ، ساپالى، ۋاقىتىلى جانە قولجەتىمدى مەديسينالىق كومەك كورسەتۋگە دەگەن ۇمتىلىسىمىز بەن قابىلەتتەرىمىزدى دالەلدەدىك.
دارىگەرلەرلەرىمىز تۇراقتى تۇردە بىلىمدەرىن جەتىلدىرىپ وتىرادى. مەديسينا عىلىمى ۇنەمى وزگەرىپ وتىرادى جانە دارىگەرلەر سوڭعى جەتىستىكتەردەن حاباردار بولۋى كەرەك. بىزدە بارلىق كارديوحيرۋرگيالىق، رەنتگەنەندوۆاسكۋليارلىق جانە ينتەرۆەنسيالىق اريتمولوگيالىق وپەراسيالار جاسالادى. پاسيەنتتەردىڭ جاعدايىنىڭ اۋىرلىعىن ەسكەرە وتىرىپ، كلينيكادا جاسالاتىن وپەراسيالاردىڭ 90%-ى - V-VII ساناتتاعى كۇردەلى وپەراسيالار. ولار - الماتىدا العاشقى دونورلىق جۇرەك ترانسپلانتاسياسى، LVAD يمپلانتاسياسى - دونورلىق جۇرەك تاپشىلىعىنا بايلانىستى جۇرەك ترانسپلانتاسياسىنا بالاما بولىپ تابىلاتىن سول جاق قارىنشانىڭ مەحانيكالىق كومەكشى قۇرىلعىسى. قولقا قاقپاقشاسىن ەندوۆاسكۋليارلىق يمپلانتاسيالاۋ (TAVI) بويىنشا جوعارى تەحنولوگيالىق كارديولوگيالىق وپەراسيالار، جۇرەك ىرعاعى بۇزىلىستارىنىڭ تەرميالىق كاتەتەرلىك ابلاسياسىنىڭ بارلىق تۇرلەرى، ونىڭ ىشىندە ەڭ كۇردەلى اريتميالاردىڭ ابلاسياسى ورىندالادى. قۇرىلعىلاردىڭ بارلىق تۇرلەرى يمپلانتاسيالانادى. ءبىز سول جاق جۇرەكشە قۇلاقشاسى وككليۋدەرىن يمپلانتاسيالايتىن جالعىز ورتالىقپىز.
بىزدە اۋتويممۋندى پاتولوگيانى دياگنوستيكالاۋدىڭ بارلىق سپەكترى، اللەرگولوگيالىق دياگنوستيكانىڭ تولىق پانەلى بار. كلينيكامىزدا جۇمىس ىستەيتىن ەلىمىزدىڭ جەتەكشى ماماندارى ورفاندىق پاتولوگياسى بار ناۋقاستاردى ەمدەيدى. بۇيرەك، باۋىر، ۇيقى بەزى پاتولوگياسىن دياگنوستيكالاۋدىڭ بارلىق سپەكترىن كەڭەيتۋدەمىز. وتكەن جىلدان باستاپ قالقانشا بەزىنىڭ قاتەرسىز تۇيىندەرىنىڭ راديوجيىلىك ابلياسياسىن جاسايمىز. بۇل ءادىس - قالقانشا بەزىنىڭ تۇيىندەرىن حيرۋرگيالىق جولمەن الىپ تاستاۋعا تاماشا بالاما.
وسى جەتىستىكتەردىڭ ارتىندا ادامدار تۇر. ينستيتۋتىمىزدا ەلىمىزدىڭ ەڭ بىلىكتى ماماندارى جۇمىس ىستەيدى: پروفەسسورلار، مەديسينا عىلىمدارىنىڭ دوكتورلارى، كانديداتتارى جانە ماگيسترلەرى، بۇل – گەماتولوگ-دارىگەر، ترانسفۋزيولوگ ولەگ رومۋالدوۆيچ حان. ول ءبىزدىڭ ينستيتۋتتا ينتەرناتۋرانى ءبىتىرىپ، 2001 جىلدان بەرى جۇمىس ىستەيدى: رەزيدەنت دارىگەر، عىلىمي قىزمەتكەر، ىشكى اۋرۋلار كافەدراسىنىڭ اسسيستەنتى، №1 تەراپيا بولىمشەسى مەڭگەرۋشىسى. ق ر گەماتولوگتار قاۋىمداستىعىنىڭ جانە رەسەيدىڭ ترومبوز، كلينيكالىق گەموستازيولوگيا جانە گەمورەالوگيا جونىندەگى مامانداردىڭ ۇلتتىق قاۋىمداستىعىنىڭ مۇشەسى. ول قاراپايىمدىلىق، جاۋاپكەرشىلىك، ادامگەرشىلىك جانە مەيىرىمدىلىك سياقتى قاسيەتتەرىمەن ەرەكشەلەنەدى.
№2 تەراپيا بولىمشەسىنىڭ مەڭگەرۋشىسى مايسا بايۇزاق قىزى كالىكوۆا - جوعارى ساناتتى ريەۆماتولوگ دارىگەر، مەديسينادا 17 جىلدىق تاجىريبەسى بار جوعارى بىلىكتى مامان. ول باسقاراتىن بولىمشەدە يننوۆاسيالىق جانە زاماناۋي ەمدەۋ ادىستەرى، رەسپۋبليكانىڭ تۇكپىر-تۇكپىرىنەن كەلەتىن اۋتويممۋندى پاتولوگياسى بار پاسيەنتتەرگە گەندىك-ينجەنەرلىك (بيولوگيالىق) تەراپيا قولدانىلادى. بۇل تەراپيا ستاندارتتى تەراپيا رەجيمى ءتيىستى اسەر ەتپەيتىن، اۋرۋدى باقىلاۋعا، رەميسسياعا قول جەتكىزۋگە، اۋتويممۋندى اۋرۋلارى بار ناۋقاستاردىڭ ءومىر ءسۇرۋ ساپاسى مەن ۇزاقتىعىن ارتتىرۋعا مۇمكىندىك بەرەتىن جاعدايلاردا قولدانىلادى. بۇل تەراپيانىڭ ساتتىلىگىنىڭ نەگىزگى فاكتورى – گەندىك-ينجەنەرلىك بيولوگيالىق تەراپيانى قولدانۋ تاجىريبەسى مەن بىلىكتىلىگى جەتكىلىكتى دارىگەرلەردىڭ بولۋى.
جوعارى ساناتتى كارديولوگ، اريتمولوگ دارىگەر گەورگيي الەكساندروۆيچ بەردىشيەۆ كونسۋلتاسيالىق-دياگنوستيكالىق ورتالىعىندا جۇمىس ىستەيدى. بىزدە كارديولوگيا ماماندىعى بويىنشا كلينيكالىق ورديناتۋرانى ءبىتىردى، سودان بەرى 2000 جىلدان باستاپ ينستيتۋتتا جۇمىس ىستەيدى: اقىلى، كارديولوگيا، كارديولوگيالىق وڭالتۋ بولىمشەسلەرىندە، كۇندىزگى ستاسيوناردا. پاسيەنتتەر دارىگەرگە ۇنەمى ريزاشىلىعىن بىلدىرەدى.
مارات ورىنباسار ۇلىنىڭ ايتۋىنشا، دارىگەر ماماندىعىنداعى ەڭ باستىسى - بار ءبىلىمىن قولدانا وتىرىپ، ادامعا دەر كەزىندە كومەك كورسەتۋ. دارىگەردىڭ كىشىگىرىم قاتەلىككە دە قۇقىعى جوق. سوندىقتان دارىگەر ءۇشىن - مەديسينا عىلىمىنىڭ بارلىق قىر-سىرىن مەڭگەرۋ، شەبەرلىكتى مەڭگەرۋ ماڭىزدى
بيىلعى جىلى ينستيتۋت الدىندا كادرلاردىڭ بىلىكتىلىگىن ارتتىرۋ، ەمدەۋ مەن دياگنوستيكانىڭ يننوۆاسيالىق ادىستەرىن ەنگىزۋ، جۇرەك ترانسپلانتاسياسىن ودان ءارى دامىتۋ، جوعارى وقۋ ورنىنان كەيىنگى ءبىلىم بەرۋدى دامىتۋ، عىلىمدى ودان ءارى دامىتۋ، كادرلىق الەۋەتتى كۇشەيتۋ سياقتى جاڭا مىندەتتەر تۇر.