ۇلتتىق كينونى قولداۋ مەملەكەتتىك ورتالىعى بيىلعى قارجىلاندىرۋعا ۇمىتكەر كينوجوبالاردى ىرىكتەۋ ءۇشىن كونكۋرستى قايتا جاريالايدى
ۇلتتىق كينونى قولداۋ ورتالىعى باسپا ءسوز قىزمەتىنىڭ مالىمەتىنشە، مۇنداي شەشىم اۋديتورلىق تەكسەرۋ قورىتىندىسى بويىنشا بەكىتىلگەن. بۇعان دەيىن جاريالانعان كونكۋرستىق وتىنىمدەردى قابىلداۋ ناتيجەلەرى جارامسىز دەپ تانىلدى، دەپ حابارلايدى Almaty-alkshamy.kz
جاڭا كونكۋرسقا ۇمىتكەرلەردىڭ قۇجاتتارى 9-29 تامىز ارالىعىندا قابىلدانادى. كينوجوبالاردى قورعاۋ، ياعني ساراپتامالىق كەڭەس وتىرىسى قىركۇيەك ايىنىڭ سوڭىندا وتەدى.
كونكۋرستىق ىرىكتەۋدىڭ قورىتىندىسى بيىل قازان ايىندا جاريالانادى.
«ءبىز مەملەكەتتىك قارجى ەسەبىنەن ءتۇسىرىلىپ، كەيىن «ۇلتتىق فيلم» دەپ تانىلاتىن جوبالار تۋرالى ايتىپ وتىرمىز. سوندىقتان تەكسەرۋ جۇرگىزگەن اۋديتورلاردىڭ ۇسىنىستارى مەن شەشىمىن ەسكەرۋ جانە ورىنداۋ كەرەك. ەڭ الدىمەن، بارلىق راسىمدەردىڭ اشىقتىعىن قامتاماسىز ەتىپ، سىبايلاس جەمقورلىق تاۋەكەلدەرىن بارىنشا بولدىرماۋ قاجەت. كينو قاۋىمداستىعى نارىقتى دامىتۋ مەن ساپانى ارتتىرۋ ءۇشىن بىرىگىپ جۇمىس ىستەۋى كەرەك. ەشقانداي ينتريگا قاجەت ەمەس. ءبىز ءوز تاراپىمىزدان ۇمىتكەرلەرگە بارىنشا كومەكتەسۋگە ءارى كينوجوبالارعا اقپاراتتىق قولداۋ كورسەتۋگە دايىنبىز. ورتالىق تا، كينوگەرلەر دە ءار تەڭگە ءۇشىن ەسەپ بەرەتىنىن ەستە ۇستاعانى ءجون»، – دەدى ۇلتتىق كينونى قولداۋ مەملەكەتتىك ورتالىعى باسقارما ءتوراعاسى قۇرمانبەك جۇماعالي.