كوپتەگەن جولاۋشىلار ءۇشىن جول ءجۇرۋ قۇنىنىڭ ءوسۋى 20 تەڭگەنى قۇرايدى. بۇل تۋرالى ءماسليحاتتىڭ VII سەسسياسىندا الماتى اكىمىنىڭ ورىنباسارى اسقار ءامرين مالىمدەدى. ول مەگاپوليستە جول ءجۇرۋ قۇنى تاسىمالداۋشىلاردىڭ شىعىندارىنىڭ وسۋىنە قاراماستان 11 جىلدان استام ۋاقىت بويى وزگەرىسسىز بولعانىن اتاپ ءوتتى، دەپ حابارلايدى almaty-akshamy.kz
«اعىمداعى تاريف تاسىمالداۋشىلاردىڭ شىعىندارىن وتەمەيدى، ويتكەنى جول ءجۇرۋدىڭ ناقتى قۇنى بەكىتىلگەننەن 3 ەسە قىمبات. وسىعان بايلانىستى اكىمدىك اي سايىن تاسىمالداۋشىلاردىڭ شىعىستارىن سۋبسيديالار تۇرىندە جابۋدا. 2020-2022 جىلدار كەزەڭىندە تولەنگەن سۋبسيديالار سوماسى 115،8 ملرد. تەڭگەنى قۇرادى»، - دەپ ناقتىلادى اسقار ءامرين.
ستاتيستيكاعا سايكەس، وتكەن ونجىلدىقتا كولىكتە جول ءجۇرۋ باعاسى رەسپۋبليكا بويىنشا باسقا قالالاردا بىرنەشە رەت وزگەردى. ءقازىر ءبىر ايلىق ابونەمەنتتىڭ قۇنى وسكەمەندە-9000 تەڭگەدەن جوعارى، قاراعاندىدا – 6000 تەڭگەدەن تومەن، الماتىدا – 7500 تەڭگە.
ەرەجەگە سايكەس، قوعامدىق كولىكتەگى جول ءجۇرۋ ءتاريفى تاسىمالداۋشىلاردىڭ شىعىندارى ارتىق بولعاننان كەيىن ۇنەمى قايتا قارالۋى كەرەك. وتكەن ونجىلدىقتا باعانىڭ جالپى ءوسۋى اياسىندا ساپار قۇنى جاساندى تۇردە ءبىر دەڭگەيدە ۇستالدى، دەگەنمەن 2012 جىلدان باستاپ وتىن مەن گاز 300%-عا قىمباتتادى.
«ينفلياسيانى، ججم باعاسىنىڭ ءوسۋىن جانە قوسالقى بولشەكتەردىڭ شىعىنىن ەسكەرە وتىرىپ، تولەنەتىن سۋبسيديالار سوماسى جىل سايىن 10-نان 30%-عا دەيىن ۇلعايادى»، - دەدى الماتى اكىمىنىڭ ورىنباسارى دەپۋتاتتار الدىندا سويلەگەن سوزىندە.
نارىق كەز كەلگەن وزگەرىستەرگە سەزىمتال: ەگەر كولىك ينفراقۇرىلىمى دامىپ جاتسا، باعالار بىردەي دەڭگەيدە قالمايدى.
«اۆتوپارك توزعان، اۆتوبۋستاعى كونديسيونەرلەر تۋرالى اڭگىمە بولعان جوق، اۆتوبۋستاردىڭ ءوزى دە جاقسى جاعدايدا ەمەس. سودان بەرى 11 جىل ءوتتى، بارلىق تاۋارلار مەن قىزمەتتەردىڭ باعاسى كوتەرىلدى، تەك جول ءجۇرۋ قۇنى وزگەرىسسىز قالدى، بۇل كەز-كەلگەن لوگيكاعا قايشى كەلەدى»، - دەپ جازادى قوعام قايراتكەرى اندرەي اندرەيەۆ. «جول ءجۇرۋ باعاسى نارىققا سايكەس بولۋى كەرەك دەگەن» تۇجىرىمعا «ورتاق جول» جول قوزعالىسى قاۋىپسىزدىگى قاۋىمداستىعىنىڭ» باسشىسى ارسەن شاكۋوۆ تا سەنىمدى.
سونىمەن قاتار، جولاۋشىلاردىڭ كوپشىلىگى ءۇشىن جول ءجۇرۋ قۇنىنىڭ ءوسۋى 20 تەڭگەنى قۇرايدى. قولما-قول اقشاسىز تولەم ءادىسىن قولداناتىندار ءۇشىن بۇل سوما ازداپ وسەدى. «الماتى كولىك حولدينگى» ج ش س دەرەكتەرى بويىنشا بارلىق جولاۋشىلار اراسىنان شامامەن 97%-عا جول ءجۇرۋ اقىسىن «وڭاي» كارتالارىمەن، ونىڭ ىشىندە «وڭاي» قوسىمشاسىندا QR-كود نەمەسە SMS-حابارلاما ارقىلى تولەيدى. جالپى، قوعامدىق كولىكتى كۇنىنە 1،4 ميلليونعا دەيىن ادام پايدالانادى.
مەگاپوليستىڭ كولىك ينفراقۇرىلىمىنىڭ جۇكتەمەسى وتە زور، بۇل رەتتە جولداردىڭ جاي-كۇيىنە، قالا بيلىگى اۆتوپاركتى جاڭارتۋعا ەرەكشە كوڭىل بولەدى.
«قولما-قول اقشاسىز تولەممەن 100 تەڭگە جانە قولما-قول تولەممەن 200 تەڭگە مولشەرىندە جاڭا تاريفتەردى قولدانۋ بيىلعى جىلى سۋبسيديالار سوماسىن شامامەن 10 ملرد تەڭگەگە تومەندەتۋگە مۇمكىندىك بەرەدى. ولاردى باسقا دا الەۋمەتتىك ماڭىزى بار جوبالارعا قايتا بولۋگە بولادى»، - دەپ ءسوزىن اياقتادى الماتى قالاسى اكىمىنىڭ ورىنباسارى اسقار ءامرين ءماسليحاتتىڭ VII سەسسياسىندا.
ايتا كەتەر بولساق، الماتىدا 10 جىلدان استام ۋاقىت ىشىندە باعىتتارعا قىزمەت كورسەتۋگە بايلانىستى بارلىق باپتارى بويىنشا كەتكەن شىعىندار 3 ەسەگە ارتقان. مىسالى، 2012 جىلى ديزەل وتىنىنىڭ باعاسى 90 تەڭگەنى قۇراسا ءقازىر ونىڭ باعاسى 295 تەڭگە، ال گازدىڭ قۇنى سول كەزدە 33 تەڭگە بولسا، بۇگىندە 108 تەڭگە. جالپى ءوسىم 3،3 ەسەنى قۇرادى. وسىعان ۇقساس جاعدايلار اۆتوبۋستاردىڭ، شينالاردىڭ، جاعارماي ماتەريالدارىنىڭ، اۆتوبۋستارعا تەحنيكالىق قىزمەت كورسەتۋ مەن جوندەۋدىڭ جانە ت. ب. قۇنىنىڭ وسۋىنە وراي قالىپتاستى.
اقپارات ءۇشىن، استانادا ءتاريفتىڭ قۇنى 90 تەڭگە جانە 180 تەڭگە، شقو-دا - 90 تەڭگە جانە 130 تەڭگە، جامبىل وبلىسىندا - 85 تەڭگە جانە 130 تەڭگە، قوستاناي وبلىسىندا - 100 تەڭگە جانە 170 تەڭگە مولشەرىندە بەلگىلەنگەن.