ۇلتتىق عىلىم اكادەمياسىنىڭ مارتەبەسى قايتارىلادى

ءتيىستى زاڭ جوباسى ازىرلەنىپ جاتىر.

عىلىم جانە جوعارى ءبىلىم ءمينيسترى ساياسات نۇربەك جاڭا مينيسترلىكتىڭ نەگىزگى جۇمىس باعىتتارىن اتادى، دەپ حابارلايدى Almaty-akshamy.kz Egemen.kz سىلتەمە جاساپ. 

ونىڭ ايتۋىنشا، عىلىم سالاسىنداعى نەگىزگى مىندەتتەردى مەملەكەت باسشىسى قاسىم-جومارت توقايەۆ الماتىعا ساپارى كەزىندە ۇلتتىق عىلىم اكادەمياسىندا ايتقان.

«ءبىرىنشىسى – ۇلتتىق عىلىم اكادەمياسىنىڭ مارتەبەسىن قايتارۋ جانە نىعايتۋ. بۇل جۇمىسپەن بەلسەندى اينالىسىپ جاتىرمىز. ءتيىستى زاڭ جوباسى ازىرلەنىپ جاتىر. ەكىنشى ۇلكەن باعىت – ۋنيۆەرسيتەت پەن جوو-داعى عىلىم. ءقازىر وكىنىشكە قاراي، ۋنيۆەرسيتەت عىلىمى نەگىزگى عىلىم بولا المادى. ىرگەلى، قولدانبالى عىلىمدى قورەكتەندىرەتىن الاڭعا اينالمادى. بۇل ىسكە دە بار كۇش-جىگەرىمىزدى سالامىز»، - دەدى ساياسات نۇربەك ۇكىمەت وتىرىسىنان كەيىن جۋرناليستەرگە بەرگەن سۇحباتىندا.

سونىمەن بىرگە، ۆەدومستۆو قىزمەتىنىڭ تاعى ءبىر ماڭىزدى باعىتى – عىلىمي-زەرتتەۋ جانە تاجىريبەلىك-كونسترۋكتورلىق ازىرلەمەلەردى نەمەسە قولدانبالى زەرتتەۋلەردى قولداۋ جانە قارجىلاندىرۋ.

«بۇل جەردە ءبىزدىڭ مينيسترلىك پىسىقتاپ جاتقان بىرنەشە جۇيەلى شارالار بار. جاقىن ارادا وسىنىڭ بارلىعىن اشىق تالقىلايمىز. ءبىز ءوزىمىزدىڭ عىلىمي قاۋىمداستىعىمىزدان، نەگىزگى جوو-نىڭ پروفەسسورلىق-وقىتۋشىلىق قۇرامىنان بازالىق تەحنيكالىق تاپسىرما الامىز»، - دەدى ساياسات نۇربەك.