14 ماۋسىم – دۇنيەجۇزىلىك قان دونورلارىنىڭ كۇنى
بىرەۋگە جاقسىلىق جاساپ، كومەكتەسۋدىڭ جولى دا، ءتاسىلى دە كوپ. سونىڭ ءبىرى دونور بولۋ دەۋگە ابدەن بولادى. اۋرۋحانالاردا، پەرزەنتحانالاردا تاۋلىك بويى قانشاما ادام قانعا ءزارۋ بولىپ جاتادى دەسەڭىزشى؟! وعان اياق استى بولاتىن جازاتايىم جازىمدار مەن جول اپاتى سياقتى وقىس وقيعالار كەزىندەگى جاراقاتتىڭ سالدارىنان قان جوعالتۋدى قوسىڭىز. قان - ادام ءومىرىنىڭ ءنارى. قان توقتاسا، ءسىزدىڭ ءومىرىڭىزدىڭ دە جولى ءۇزىلۋى مۇمكىن. سول سەبەپتى دونورلاردى ءومىر سىيلاۋشىلار دەپ تەككە ايتپاسا كەرەك. الماتى قالالىق قان ورتالىعى جىل سايىن دۇنيەجۇزىلىك قان دونورلارى كۇنىن ايىرىقشا اتاپ ءوتىپ، قالا تۇرعىندارىنىڭ دەنساۋلىعىن جاقسارتۋ مەن ءومىرىن ساقتاپ قالۋعا قان بەرۋ ارقىلى جاردەمدەسىپ جۇرگەن بەلسەندى دونورلارىنا جۇرتشىلىق اتىنان راحمەت ايتىپ، ولارعا قۇرمەت كورسەتۋدى وزدەرىنىڭ داستۇرلەرىنە اينالدىرعان.
قان ورتالىعى اشىلعان ون سەگىز جىلدان بەرى قان قىزمەتىن جاقسارتۋ ءىسى بويىنشا اۋقىمدى ىستەر اتقارىلدى. قالامىزداعى ەمدەۋ مەكەمەلەرىن ءقاۋىپسىز قان ونىمدەرىمەن قامتاماسىز ەتۋ ءۇشىن قان جانە ونىڭ كومپونەنتتەرىن دايىنداۋدىڭ زاماناۋي ادىستەرى مەن تاسىلدەرى، قان تالداۋدىڭ جاڭا ستاندارتتارى قولدانىسقا ەنگىزىلدى. الماتى قالالىق قان ورتالىعى الماتى قالاسى مەن الماتى وبلىسى بويىنشا جيىرمادان استام ەمدەۋ مەكەمەلەرىن قان ونىمدەرىمەن قامتاماسىز ەتىپ كەلەدى. بۇگىندە ورتالىققا كەلىپ قان تاپسىراتىن ەرىكتى دونورلاردىڭ دا قاتارى ءوسىپ، ولاردىڭ سانى ءۇش ەسەگە ارتقان.
- بۇل - ءبىزدىڭ حالىقتىڭ دا دونور بولۋ بىرەۋگە قان بەرۋ عانا ەمەس، ءوز دەنساۋلىعىڭدى جاقسارتىپ، سالاۋاتتى ءومىر سالتىن ۇستانۋعا ءوزىڭدى تاربيەلەۋدىڭ جارقىن جولى ەكەنىن تۇسىنە باستاعانى. ويتكەنى دەنى ساۋ ادام عانا دونور بولا الادى. سوندىقتان ءبىز ءوز دەنساۋلىعى ارقىلى وزگەنىڭ دەنساۋلىعىن جاقسارتۋعا ۇلەس قوسىپ جۇرگەن دونورلارىمىزعا العىسىمىز شەكسىز. قۇرمەتىمىز زور. ولارعا راحمەت ايتىپ، كوپتىڭ العىسىن جەتكىزۋ - ءبىزدىڭ ازاماتتىق پارىزىمىز. بۇگىنگى سالتاناتتى جيىن دونورلارىمىزعا دەگەن قۇرمەتىمىزدىڭ ءبىر پاراسى عانا، – دەيدى ورتالىقتىڭ ديرەكتورى جاندوس قۋانىشبەك ۇلى ءنادىروۆ.
دونورلاردى قۇرمەتتەۋگە ارنالعان سالتاناتتى جيىنعا قالالىق قوعامدىق دەنساۋلىق باسقارماسى باسشىسىنىڭ ورىنباسارى نازگۇل مەلس قىزى يمانعالييەۆا قاتىسىپ، قان تاپسىرۋ ارقىلى ناۋقاس جاندارعا ءومىر ءنارىن سىيلاپ جۇرگەن دونورلارعا العىسىن ءبىلدىرىپ، ولارعا ورتالىقتىڭ العىس حاتى مەن ەستەلىك سىيلىقتارىن تابىس ەتتى. «راحمەت ساعان، دونور!» دەگەن جۇرەكجاردى العىسقا يە بولعانداردىڭ قاتارىندا ۆ. زوممەر، ا.ساتيموۆ، ب. چينيبەكوۆا، ق.زارقۇموۆ، ر. اكيشيەۆ، م. گەتمانچۋك، ا. سەيىتقوجايەۆ سەكىلدى تۇراقتى دونورلار بار.
ءقازىر ورتالىق دونورلارىنىڭ سانى 15 مىڭعا جەتسە، دوناسيا سانى جيىرما مىڭدى قۇراپ وتىر. ال بيىلعى دۇنيەجۇزىلىك قان دونورلارى كۇنىنىڭ ۇندەۋى «دونور بولۋ - ءبىزدىڭ ىنتىماقتاستىعىمىزدىڭ اكتىسى. دونور بولىپ، وزگەگە ءومىر سىيلا!» ءسىز دە وسى ۇندەۋگە ءۇن قوسىپ، دونور بولىپ، بىرەۋگە ءومىر سىيلاۋعا اسىعىڭىز! ادامعا ءومىر سىيلاۋدان ارتىق قايىرىمدى ءىس بولماس، ولاي بولسا، قولدان كەلەر ىسكە اسىعايىق!