ورتالىق مەشىتتە مەملەكەتتىك رامىزدەر كۇنىنە وراي دوڭگەلەك ۇستەل ءوتتى
دوڭگەلەك ۇستەل جۇمىسى قۇران اياتتارىن وقۋدان باستالدى. مەملەكەتتىك رامىزدەردىڭ قۇندىلىعى تۋرالى باياندامامەن جالعاستى. الماتى قالاسى ءدىن ىستەرى جونىندەگى باسقارما باسشىسى، الماتى قالاسىنىڭ باس يمامى جانە قالا مەشىتتەرىنىڭ يمامدارى قاتىسىپ، ۇلتتىق قۇرىلتايدا ايتىلعان ۇسىنىستاردى تالقىلادى. سونداي-اق، الدا كەلە جاتقان مۇسىلمانداردىڭ ۇلىق مەرەكەسى – قۇربان ايت مەرەكەسىنە وراي ماسەلەلەرگە توقتالدى.
جيىنعا قاتىسۋشى الماتى قالاسىنىڭ باس يمامى تولەبي وسپاننىڭ ايتۋىنشا، بۇگىنگى مەرەكەنىڭ مەملەكەت ءۇشىن ماڭىزى جوعارى.
«ۇلتتىق قۇرىلتايدىڭ ءۇشىنشى وتىرىسىندا جاقسى وي-ۇسىنىستار ايتىلدى. پرەزيدەنت قۇرىلتايدا جاستار اراسىندا كىتاپ وقۋدى دامىتۋدى ەرەكشە اتاپ ءوتتى. مۋفتيات قازىرگى تاڭدا قازاق جانە ورىس تىلدەرىندە 30-دان استام كىتاپ شىعاردى. مۇمكىندىگىنشە، مەشىتتەردە كىتاپحانا پۋنكتتەرىن ۇيىمداستىرۋدى جوسپارعا ەنگىزىپ وتىر. الماتى قالاسىنداعى ءبىرقاتار مەشىتتەردە كىتاپحانا پۋنكتتەرى جۇمىس ىستەيدى. دەسترۋكتيۆتى ناسيحاتتارعا بالالار دا ىلەسىپ كەتىپ جاتىر. بۇل ماسەلە ۇلتتىق قۇرىلتايدا ايتىلدى. ماسەلەلەردىڭ ءبارى جۇمىس جوسپارىنا ەندى. ونىڭ ىشىندە وسى دەسترۋكتيۆتى ءدىني اعىمداردىڭ الدىن الۋ بويىنشا تاپسىرمالار بەرىلدى»،-دەدى ول.
«وكىنىشكە قاراي، مەملەكەتتىك رامىزدەردىڭ قۇندىلىعىن، ءمانىسىن تۇسىنبەيتىن جاستارىمىز بار. ءانۇران قوسىلعاندا ءوزىن قالاي ۇستاۋدى بىلمەي، «قولىن جۇرەك تۇسىنا ۇستاۋ – دىنگە قايشى كەلەتىن ارەكەت» دەپ اداسىپ جۇرگەندەردى كورىپ ءجۇرمىز. رامىزدەردى قۇرمەتتەۋگە تاربيەلەۋ ءۇشىن يمامداردىڭ ۇگىت-ناسيحات جۇمىسى اۋاداي قاجەت. ۇلتتىق قۇندىلىقتارىمىزدى دارىپتەۋدە مەشىت يمامدارىنىڭ جاۋاپكەرشىلىگى جوعارى. جىلىنا ءبىر-اق رەت كەلەتىن مارتەبەسى بيىك مەرەكەنى ءتيىستى دەڭگەيدە اتاپ ءوتۋىمىز كەرەك»،-دەدى الماتى قالاسى ءدىن ىستەرى جونىندەگى باسقارماسىنىڭ باسشىسى نۇرلان مەدسانت ۇلى.
تاقىرىپقا وراي
بولاتبەك قاجى ۇلاسقان ۇلى، «بايكەن» مەشىتىنىڭ باس يمامى:
تاريحىمىزدىڭ شىنايى كورىنىسى
ءيا، ءبىز ءارقاشان اللا تاعالاعا سانسىز شۇكىرشىلىك ەتۋگە مىندەتتىمىز. ويتكەنى، اللا بىزگە سانسىز نىعمەتتەرىن بەرىپ جاتىر. ونىڭ باستىسى – ەگەمەندى ەلىمىز، تاۋەلسىز مەملەكەتىمىز. ەگەمەندىكتىڭ باستى بەلگىسى – مەملەكەتتىك رامىزدەر. كوگىمىزدە كوك تۋىمىز جەلبىرەپ، ەلتاڭبامىز بەن ءانۇرانىمىزدى بەكىتكەن ساتتەن باستاپ، ەلدىگىمىزدىڭ بەلگىسىن الەم جۇرتشىلىعى مويىندادى. مەملەكەتتىك رامىزدەر تالاي عاسىردان سىر شەرتەتىن، تاريحىمىزدىڭ شىنايى كورىنىسى بولىپ سانالادى. ونىڭ مازمۇندى نىشاندارى كەشەگى وتكەنىمىزدى ايشىقتاپ، ەرتەڭگى ماقساتىمىزدى ايقىنداپ تۇر. سوندىقتان مەملەكەتتىك رامىزدەردىڭ تاريحى مەن ءمانىن ءبىلۋ، ولاردى قۇرمەت تۇتۋ – ءاربىر قازاقستاندىقتىڭ ازاماتتىق بورىشى.