مىنە، كوپتەن كۇتكەن جازعى دەمالىستا باستالدى. وقۋشىلار ءۇشىن جازعى دەمالىستىڭ قىزىققا تولى كۇندەرى دە ءالى الدا. جاز جايناتىپ، كۇن كۇلدىرىپ، ءبىز لاگەرگە بارامىز، - دەپ وقۋ جىلى اياقتالىسىمەن مەكتەپ وقۋشىلارى جازعى لاگەرلەرگە بارۋعا اسىعادى. جايراڭداعان جازدىڭ قۋانىش پەن شاتتىققا تولى ۇمىتىلماس ەستەلىكتەرى بالالاردىڭ وسىنداي جازعى دەمالىس لاگەرىنەن باستاۋ الارى ءسوزسىز.
الماتى قالاسى، اۋەزوۆ اۋدانىنا قاراستى № 173 مەكتەپ-ليسەيدە بايىمبەتوۆا ليايليا مۇحامەدجان قىزى باسشىلىعىمەن، وقۋ-تاربيە پروسەسسىنىڭ ساباقتاستىعىن ، بالالاردىڭ دەمالىسى مەن ساۋىقتىرۋىنىڭ ءارتۇرلى قاجەتتىگىن قامتاماسىز ەتۋ ماقساتىندا مامىر ايىنىڭ 27.05.- 7.06.24ج ارالىعىندا اشىلعان «عاجايىپ الەم» جازعى دەمالىس لاگەرى ءوز جۇمىسىن باستاپ كەتتى.
دەمالۋشىلارعا قاۋىپسىزدىك ەرەجەلەرى تولىق تانىستىرىلدى. لاگەر توپتارىنا بولىنگەن كابينەتتەر سانيتارلىق تالاپقا ساي بەزەندەندىرىلىپ، بالالارعا جايلى جاعداي جاسالۋى ەسكەرىلگەن. سونداي-اق بالالاردىڭ ساياحاتتارى مەن ەكسكۋرسسيالارىن ساپالى ۇيىمداستىرۋ قاراستىرىلعان. بالالاردىڭ ءومىر قاۋىپسىزدىگى مەن دەنساۋلىعىنا جاۋاپتىلىق تاربيەشى ۇستازدارعا جۇكتەلىپ وتىر. مەكتەپ جانىنان قۇرىلعان جازعى دەمالىس ورنىندا بۇگىندە 312 بالدىرعان بوس ۋاقىتتارىن ءتيىمدى دە كوڭىلدى وتكىزىپ جاتىر. ولاردىڭ ىشىندە كوپ بالالى جانە الەۋمەتتىك جاعىنان از قامتىلعان وتباسى بالالارىنىڭ قامتىلۋى باستى نازارعا الىندى.
اتاپ ايتساق «بالدىرعان» ، «بالاپان»، «ايالا»، «كۇنشۋاق»، «ايگولەك»، «بولاشاق»، «قۇلىنشاق»، «بالاۋسا» اتتى توپتار قۇرىلىپ، جەتەكشىلەرى بەكىتىلىپ، جوسپار بويىنشا كۇندەلىكتى جۇمىستارى ءوز دەڭگەيىندە كوڭىلدى دە قىزىقتى ءوتىپ جاتقانىن ايتقىم كەلەدى. سونىمەن قاتار وقۋشىلار اراسىندا ءارتۇرلى ويىندار مەن ءىس-شارالار ۇيىمداستىرىلدى. «ەرتەگىلەر الەمىندە» ، «جاس اسپازدار بايقاۋى»، «دەنساۋلىق كۇنى»، «سۋعا ءجۇزۋدى ۇيرەنەمىن»، «قىش قۇمىرا» سياقتى وتكىزىلگەن جۇمىستار وقۋشىلاردىڭ بەلسەندىلىكتەرى مەن قىزىعۋشىلىقتارىن ارتتىرا تۇسۋدە.
جازعى ۇلكەن ءۇزىلىس ۇزاق وقۋ جىلىنان كەيىن مەكتەپ وقۋشىلارىنىڭ دەنساۋلىعىن بەكىتۋ، دەنەسىن شىنىقتىرۋ كۇش جيناۋى ءۇشىن بەرىلە وتىرىپ، كەلەسى وقۋ جىلىنا سەرگەكتىكپەن ورالۋىنا ىقپال ەتەدى دەسەك ارتىق ايتقاندىق ەمەس.
بالالار ءۇشىن جاز مەزگىلى وتە پايدالى ءوتۋى ءتيىس. بۇل مەزگىلدە ولار ءوز ۋاقىتتارىن ءتيىمدى پايدالانىپ، جازعى دەمالىس ورىندارىنا بارۋ ارقىلى تانىمدىق، تاعىلىمدىق تۇرعىدان دامي الادى. سوندىقتان جاز مەزگىلىندە وسىنداي جازعى ساۋىقتىرۋ لاگەرى بالالاردىڭ مۇمكىندىكتەرىن ودان ءارى اشا تۇسەدى ،- دەپ ايتقىم كەلەدى.
