شىلدەدە ەلىمىزدىڭ مەملەكەتتىك بورىشىنا شامامەن 100 ملرد تەڭگە قاراجات سالىندى.
بۇل تۋرالى بۇگىن ۇكىمەت وتىرىسىندا ۇلتتىق بانك ءتوراعاسىنىڭ ورىنباسارى ۆيتاليي تۋتۋشكين ايتتى، دەپ حابارلايدى Almaty-akshamy.kz.
«بيىل شىلدە ايىنىڭ سوڭىندا تەڭگە باعامى 1 دوللار ءۇشىن 445،89 تەڭگەگە دەيىن نەمەسە قاڭتار-شىلدە ايلارىندا 3،6 پايىزعا نىعايدى. شىلدە ايىندا تەڭگەنىڭ 1،4 پايىزعا نىعايۋىنا مۇناي باعاسىنىڭ ءوسۋى، بەيرەزيدەنتتەردىڭ مەملەكەتتىك باعالى قاعازدارعا ينۆەستيسيالاۋى سەبەپ بولدى. شىلدە ايىنىڭ وزىندە قازاقستان رەسپۋبليكاسىنىڭ مەملەكەتتىك بورىشىنا شامامەن 100 ملرد تەڭگە قاراجات سالىندى»، - دەدى ول.
ۇب ءتوراعاسى ورىنباسارىنىڭ ايتۋىنشا، رەسپۋبليكالىق بيۋدجەتكە ترانسفەرتتى قامتاماسىز ەتۋ ءۇشىن ۇلتتىق قوردان شىلدە ايىندا 591 ملن دوللارعا ۆاليۋتا ساتۋ دا تەڭگەگە قولداۋ كورسەتتى. ۆاليۋتانى مىندەتتى ساتۋ ۇلەسى 1 شىلدەدەن باستاپ 50 پايىزدان 30 پايىزعا دەيىن تومەندەتىلگەننەن كەيىن كۆازيمەملەكەتتىك كومپانيالاردىڭ ۆاليۋتا ساتۋ ۇلەسى شىلدە ايىندا 195 ملن دوللار بولدى.
«ءبىرىڭعاي جيناقتاۋشى زەينەتاقى قورىنىڭ ۆاليۋتا ساتىپ الۋى شىلدە ايىندا 240 ملن دوللاردى قۇرادى. قازاقستاننىڭ دەپوزيتتەرگە كەپىلدىك بەرۋ قورى ءوز اكتيۆتەرىنىڭ ۆاليۋتالىق ۇلەسىن 15 پايىزعا دەيىن بىرتىندەپ كوتەرۋدى جوسپارلاپ وتىرعانىن اتاپ وتەيىن. ۇلتتىق بانك يكەمدى باعام بەلگىلەۋ رەجيمىن ۇستانادى جانە ۆاليۋتالىق ينتەرۆەنسيالار جۇرگىزبەيدى»، - دەدى ۆيتاليي تۋتۋشكين.