دوللاردىڭ رەسمي باعامى 8 شىلدەدە 477،24 تەڭگەنى قۇرادى.
ۇلتتىق بانكتىڭ مونەتارلىق وپەراسيالار دەپارتامەنتىنىڭ ديرەكتورى نۇرجان تۇرسىنحانوۆ ۆاليۋتا نارىعىنداعى قازىرگى جاعداي تۋرالى ءتۇسىندىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ونىڭ پايىمىنشا، دامىعان جانە دامۋشى ەلدەردىڭ ۆاليۋتالارى ينفلياسيا مەن گەوساياسي تۇراقسىزدىققا قارسى كۇرەس اياسىندا قىسىمعا ۇشىراپ وتىر. ۇلتتىق ۆاليۋتا دا ورنىعىپ قالعان ىشكى فاكتورلارعا بايلانىستى جانە سىرتقى وزگەرىستەردىڭ اسەرىنەن قۇبىلمالى كۇي كەشۋدە.
«دوللاردىڭ رەسمي باعامى اي باسىنان بەرى 12،16 تەڭگەگە نەمەسە 2،6%-عا السىرەپ، 8 شىلدەدە 477،24 تەڭگەنى قۇرادى. بۇل ورايدا، اقش دوللارىنىڭ جاھاندىق نىعايۋى، ەنەرگيا تاسىمالداۋشىلار باعاسىنىڭ تومەندەۋى، سونداي-اق قازاقستانداعى كاسپيي قۇبىرى جەلىسى كونسورسيۋمىنىڭ تەڭىز تەرمينالى قىزمەتىن توقتاتا تۇرۋ تاۋەكەلدەرى، سول سەبەپتەن نارىققا قاتىسۋشىلار سەنتيمەنتىنىڭ ناشارلاۋى، قازاقستاندىق كومپانيالاردىڭ يمپورتتىق وپەراسيالارى تەڭگە ديناميكاسىنا اسەر ەتكەن نەگىزگى فاكتورلار بولدى. اقش قازىناشىلىق وبليگاسيالارى كىرىستىلىگىنىڭ ءوسۋى مەن اقش دوللارىنىڭ نىعايۋى دامىعان، سول سياقتى دامۋشى ەلدەردىڭ ۆاليۋتالارىنا قىسىم جاسادى»، - دەدى ول.
نۇرجان تۇرسىنحانوۆتىڭ مالىمەتىنشە، DXY يندەكسى 7 شىلدەدە 107،13 دەڭگەيىنە دەيىن، ياعني 2،3%-عا ءوستى، ال JPMorgan دامۋشى ەلدەرى ۆاليۋتالارىنىڭ يندەكسى 3،3%-عا السىرەدى. ەۋرونىڭ اقش دوللارىنا قاتىستى 1،016 دەڭگەيىنە دەيىن السىرەۋى شامامەن تەپە-تەڭدىككە جەتىپ، ەلەۋلى جاعداي ورىن الدى.
«7 شىلدەدەگى جاعداي بويىنشا، Brent ماركالى مۇناي باعاسى اي باسىنان بەرى 8،8%-عا تومەندەپ، باررەلىنە 104،65 اقش دوللارىن قۇرادى. ماسكەۋ بيرجاسىنداعى رەسەي ءرۋبلىنىڭ باعامى اي باسىنان بەرى 20%-عا السىرەپ، 61،95 دەڭگەيىندە قالىپتاستى. ىشكى فاكتورلار اراسىندا يمپورتتىق وپەراسيالاردى جۇزەگە اسىرۋ ءۇشىن ۆاليۋتاعا ساقتالىپ وتىرعان سۇرانىس، سىرتقى بورىشتاردى وتەۋ، سونداي-اق جەكە تۇلعالار تاراپىنان شەتەل ۆاليۋتاسىنا تۇراقتى سۇرانىس تەڭگە ديناميكاسىنىڭ نەگىزىن قالادى»، - دەدى ۇلتتىق بانك وكىلى.
جالپى العاندا، ەنەرگيا تاسىمالداۋشىلار باعاسىنىڭ تومەندەۋىنە بايلانىستى نارىققا قاتىسۋشىلار سەنتيمەنتىنىڭ ناشارلاۋى بايقالادى.
ەركىن وزگەرمەلى باعام جاعدايىندا تەڭگە ءۇشىن قۇبىلمالىلىقتىڭ ورىن الۋى – نارىقتاعى قالىپتى جاعداي.
ماماننىڭ ايتۋىنشا، اي باسىنان بەرى ۇلتتىق بانك ۆاليۋتالىق ينتەرۆەنسيالار جۇرگىزگەن جوق. بۇل رەتتە قارجىلىق تۇراقتىلىققا تونەتىن ءقاۋىپتى بولدىرماۋ ءۇشىن ۆەدومتسۆو شامادان تىس باعام قۇبىلمالىعى كەزىندە ۆاليۋتا ساۋدا-ساتتىعىنا ارالاسۋ قۇقىعىن وزىنە قالدىرادى.
«قىسقا مەرزىمدى پەرسپەكتيۆادا تەڭگە ديناميكاسى يمپورتتىق وپەراسيالار مەن دەمالىس ماۋسىمى اياسىندا قاتىسۋشىلار تاراپىنان شەتەل ۆاليۋتاسىنا سۇرانىستىڭ ارتۋىنا بايلانىستى بولادى. كورشىلەس وڭىرلەردەگى گەوساياسي احۋال، سونداي-اق الەمدىك نارىقتارداعى جاعدايلار دامۋشى ەلدەردىڭ ۆاليۋتالارىنا قاتىستى ينۆەستورلاردىڭ جالپى سەنتيمەنتىنە ىقپالىن ساقتايدى»، - دەدى نۇرجان تۇرسىنحانوۆ.
ۇلتتىق بانك تەڭگەرىمسىزدىكتەردىڭ جيناقتالۋىن بولدىرمايتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجيمىن ۇستانۋدى جالعاستىرا بەرەدى.