شارا ءبىرىنشى تامىزعا دەيىن جالعاسادى.
قازاقستانداعى ۇكىمەتتىك ەمەس ۇيىمدار الەۋمەتتىك جوبالارعا قاتىسۋ ءۇشىن ءوز ۇسىنىستارىن جاساپ جاتىر، دەپ حابارلايدى Almaty-akshamy.kz.
«2023 جىلعا ارنالعان الەۋمەتتىك جوبالار تاقىرىپتارىن قالىپتاستىرۋعا قاتىستى ۇسىنىستاردى قابىلداۋ 1 تامىزعا دەيىن جالعاسادى. ۇەۇ ءوز ۇسىنىمدارىن قابىلداۋ ازاماتتىق باستامالاردى قولداۋ ورتالىعىنىڭ رەسمي سايتىندا جۇرگىزىلىپ جاتىر»،- دەلىنگەن اقپارات جانە قوعامدىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
ق ر اقپارات جانە قوعامدىق دامۋ مينيسترلىگى مەن ازاماتتىق باستامالاردى قولداۋ ورتالىعىنىڭ بىرلەسكەن جوباسىنىڭ اياسىندا ورتالىقتىڭ رەسمي سايتىندا ازاماتتىق سەكتور مەن قوعام وكىلدەرىنە الەۋمەتتىك جوبالار تاقىرىپتارىن قالىپتاستىرۋعا قاتىستى ءوز ۇسىنىستارىن ەنگىزۋگە مۇمكىندىك بەرەتىن «Birgemiz» كراۋدسورسينگتىك پلاتفورماسى جۇمىس ىستەۋدە.
ۇسىنىستار اعىمداعى جىلدىڭ 1 تامىزىنا دەيىن قابىلدانادى. بۇدان كەيىن حالىقتىڭ سۇرانىسىنا، مەملەكەتتىك ساياساتتىڭ باسىمدىقتارىنا، زاڭنامالىق جانە وزگە دە تالاپتارعا ساي ۇسىنىستار ەگجەي-تەگجەيلى تالداۋ جۇرگىزۋ ماقساتىندا ق ر اقپارات جانە قوعامدىق دامۋ مينيسترلىگىنە جولداناتىن بولادى.
ۇسىنىستاردى مىنا سىلتەمە ارقىلى جىبەرۋگە بولادى: https://cisc.kz/kk/15062022