ۇلتتىق بانك ماماندارى قازاقستاننىڭ قاي وڭىرىندە ينفلياسيا ءورشىپ تۇرعانىن ايتتى

ەلدە ايلىق ينفلياسيا 0،7%-دى قۇرادى.

قازاقستاننىڭ ۇلتتىق بانك ماماندارى ەلىمىزدىڭ قاي وڭىرىندە ينفلياسيا ءورشىپ تۇرعانىن ايتتى، دەپ حابارلايدى Almaty-akshamy.kz.

ۇلتتىق بانكىنىڭ اقشا-كرەديت ساياساتى دەپارتامەنتى ناقتى سەكتور مونيتورينگى باسقارماسىنىڭ باستىعى يگور وسيپوۆتىڭ مالىمەتى بويىنشا، 2022 جىلعى قاڭتاردا ەلدە جىلدىق ينفلياسيا 8،5% بولىپ (2021 جىلعى جەلتوقساندا – 8،4%)، جەدەلدەدى. ايماقتار بويىنشا جىلدىق ينفلياسيا 10 وڭىردە قارقىن الدى، 5 وڭىردە باياۋلاسا، 2 وبلىستا وزگەرىسسىز قالدى.

ينفلياسيانىڭ اسا قارقىن الۋ كورسەتكىشى اقتوبە وبلىسىندا (جەلتوقسانداعى 8،7%-دان قاڭتاردا 9،2%-عا دەيىن) تىركەلدى، كەرىسىنشە، باياۋلاۋ ءۇردىسى ماڭعىستاۋ وبلىسى (9،2%-دان 8،7%-عا دەيىن) مەن استانادا (8،8%-دان 8،3%-عا دەيىن) بايقالدى.

قاڭتاردا ازىق-تۇلىك تاۋارلارى باعاسىنىڭ ءوسۋ قارقىنى ءبىر اي بۇرىنعى 9،9%-دىق دەڭگەيدە ساقتالدى. وسى توپتاعى تاۋارلار باعاسىنىڭ ەڭ جوعارى ءوسىمى اقمولا وبلىسىندا قالىپتاستى (11،7%).

ازىق-تۇلىككە جاتپايتىن تاۋارلار باعاسىنىڭ ءوسىمى دە ءوز ءمانىن 8،5%-دىق دەڭگەيدە ساقتادى. ەڭ جوعارى ماندەر اقمولا مەن اقتوبە وبلىستارىندا (10،2%-دان)، ەڭ تومەن ءمان ماڭعىستاۋ وبلىسىندا (7،1%) تىركەلدى.

اقىلى كورسەتىلەتىن قىزمەتتىڭ باعاسى قاڭتاردا 6،8%-عا ءوستى (جەلتوقساندا - 6،5%)، بۇل رەتتە جالپى رەسپۋبليكالىق دەڭگەيدەن باعا ءبىرشاما جوعارى – باتىس قازاقستان جانە شىعىس قازاقستان وبلىستارىندا (8،2%-دان)، ءبىرشاما تومەن – اقمولا وبلىسىندا (5،3%).

ەلدە ايلىق ينفلياسيا 0،7%-دى قۇرادى، بۇل سوڭعى 5 جىلدا قاڭتارداعى باعانىڭ ورتاشا مانىنەن جوعارى (2017-2021 جىلدارى: 0،6%). ورتاشا تاريحي نورماسىنان جوعارى باعا 2022 جىلعى قاڭتاردا الماتى قالاسىندا (1،0%)، اقتوبە (0،9%)، قاراعاندى (0،9%) وبلىستارىندا، شىمكەنت قالاسىندا (0،9%)، اقمولا (0،8%)، باتىس قازاقستان (0،7%) جانە سولتۇستىك قازاقستان وبلىستارىندا (0،6%) ءوستى.

ماڭعىستاۋ، اتىراۋ، پاۆلودار جانە قوستاناي وبلىستارىندا باعانىڭ ءوسۋ قارقىنى ءوزىنىڭ ورتاشا تاريحي نورماسىن ساقتاپ قالدى. قالعان وڭىرلەردە باعانىڭ ايلىق ءوسۋ قارقىنى ءوزىنىڭ ورتاشا نورماسىنان تومەن قالىپتاستى.