اتالعان زاڭدا جازۋشىنىڭ مارتەبەسى دە انىقتالماعان.
جازۋشىلار وداعى ءتوراعاسىنىڭ ورىنباسارى اقبەرەن ەلگەزەك قولدانىستاعى «مادەنيەت تۋرالى» زاڭدا كوركەم ادەبيەت تۋرالى ناقتى تاراۋ جوق ەكەنىن، جازۋشىنىڭ مارتەبەسى دە انىقتالماعانىن ايتادى، دەپ حابارلايدى Almaty-akshamy.kz
«زاڭدا تەاترلار مەن كىتاپحانا تۋرالى تاراۋلار بار، ءتىپتى كينو سالاسىندا ارنايى زاڭ قابىلدادىق. ونىڭ ءبارى كەرەك، ءبارى دۇرىس. ءبىراق وسى تەاتر مەن كينونىڭ نەگىزىندە قانداي دۇنيە جاتىر؟ ول، ارينە، ادەبيەت. ادەبيەت بولماسا، كينو مەن تەاتر قويىلىمى قايدان شىقسىن؟ كىتاپحانا تۋرالى تاراۋ بار، ءبىراق سول كىتاپحانا سورەلەرىندە ادەبي كىتاپتار تۇرعان جوق پا؟» - دەدى اقبەرەن ەلگەزەك ەلوردادا مادەنيەت جانە سپورت مينيسترلىگىنىڭ القا ماجىلىسىندە.
ونىڭ ايتۋىنشا، زاڭدا ادەبيەت تۋرالى جاناما عانا ايتىلادى.
«مىسالى، قوعامدىق ماڭىزدى ادەبيەت تۋرالى تاراۋ بار جانە ول تاراۋدا ول ادەبيەتتى شىعارىپ باسۋ مەن تاراتۋ تۋرالى بۇلىڭعىر ەرەجە بار. ال ناقتى كوركەم ادەبيەت تۋرالى تاراۋ جوق. نەگە ءبىز قازاقتىڭ كوركەم ادەبيەت دەگەن سوزىنەن قاشامىز، سونى قالامگەرلەر قاۋىمى تۇسىنبەيدى. اتالعان زاڭدا جازۋشىنىڭ مارتەبەسى دە انىقتالماعان. شىعارماشىلىق قىزمەتكەر دەگەن ءسوز بار، ءبىراق ونىڭ قوعامدىق ورنى مەن ءرولى ناقتى ايتىلماعان. ءبىزدىڭ ويىمىزشا، الداعى ۋاقىتتا اتالعان زاڭدا كوركەم ادەبيەت تۋرالى، جازۋشىنىڭ مارتەبەسى مەن ونىڭ گونورار جولدارىن انىقتايتىن ەرەجەلەرى بار بولەك تاراۋ ەنگىزۋ قاجەت. وعان ساياسي ەرىك-جىگەر بولسا، وسى تاراۋدى جاساقتايتىن جۇمىس توبىنا قاتىسىپ، كومەكتەسۋگە دايارمىز»، - دەدى اقبەرەن ەلگەزەك.