وتكەن ايدا تەڭگە 0،14%-عا السىرەدى.
قاراشادا ۇلتتىق بانك ۆاليۋتالىق ينتەرۆەنسيالار جۇرگىزگەن جوق، سونداي-اق بجزق مەن سەنىمگەرلىك باسقارۋداعى باسقا دا قورلاردىڭ زەينەتاقى اكتيۆتەرى ءۇشىن شەتەل ۆاليۋتاسىن ساتىپ الۋ نەمەسە ساتۋ بويىنشا وپەراسيالار جۇرگىزبەدى، دەپ حابارلايدى Almaty-akshamy.kz.
ورتالىق بانك وكىلدەرىنىڭ مالىمەتىنە سۇيەنسەك، قاراشانىڭ قورىتىندىسى بويىنشا، تەڭگە باعامى 1 اقش دوللارى ءۇشىن 468،90 تەڭگەگە دەيىن 0،14%-عا السىرەدى.
«قازاقستان قور بيرجاسىنداعى ساۋدا-ساتتىقتىڭ ورتاشا ءبىر كۇندىك كولەمى ءبىر ايدا 121-دەن 132 ملن اقش دوللارىنا دەيىن ۇلعايدى. ساۋدا-ساتتىقتىڭ جالپى كولەمى 2،9 ملرد اقش دوللارىن قۇرادى. مۇناي باعاسى تومەندەگەنىنە قاراماستان، ۆاليۋتا نارىعى سۇرانىس پەن ۇسىنىس تۇرعىسىنان، كوبىنە، "توقساندىق سالىق اپتاسى" فاكتورى ەسەبىنەن تەڭگەرىلدى»، – دەلىنگەن ق ر ۇلتتىق بانكىنىڭ باسپا ءسوز قىزمەتى حابارلاماسىندا.
ۇلتتىق بانكتىڭ باسپا ءسوز قىزمەتىنىڭ حابارلاۋىنشا، كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمىن ساتۋى وتكەن ايدىڭ ىشىندە شامامەن 500 ملن اقش دوللارىنا تەڭ بولدى. كۆازيمەملەكەتتىك سەكتور كومپانيالارى ۆاليۋتا نارىعىندا ساتۋدى ەكىنشى دەڭگەيلى بانكتەر ارقىلى دەربەس جۇزەگە اسىرادى.
«ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن ۆاليۋتانى ساتۋ قاراشادا 70 ملن اقش دوللارىنا تەڭ بولدى. ۇلتتىق قوردان ساتۋ ۇلەسى ساۋدا-ساتتىقتىڭ جالپى كولەمىنەن 2،4% جانە ءبىر كۇندە كەمىندە 10 ملن اقش دوللارى بولدى. ۇلتتىق قوردىڭ قاراجاتىمەن وپەراسيالار جۇرگىزۋ كەزىندە ۇلتتىق بانك نارىقتىق بەيتاراپتىق قاعيداتىن ساقتايدى، بۇل شەتەل ۆاليۋتاسىن تۇراقتى جانە بىركەلكى ساتۋدى بىلدىرەدى»، – دەلىنگەن ۇلتتىق بانكتىڭ باسپا ءسوز قىزمەتى مالىمەتىندە.
بانك وكىلدەرىنىڭ سوزىنشە، بۇل تاجىريبە ۇلتتىق قور وپەراسيالارىنىڭ ۆاليۋتا نارىعىنا اسەرىن بارىنشا ازايتۋعا مۇمكىندىك بەرەدى.