قازاقستان ۇلتتىق بانكى 2021 جىلعى ءبىرىنشى جارتىجىلدىقتىڭ قورىتىندىسى بويىنشا ەسەپتىك تولەم بالانسىن قالىپتاستىردى.
اعىمداعى شوتتىڭ تاپشىلىعى 2021 جىلعى تامىزدا جاريالانعان الدىن الا باعالاۋمەن سالىستىرعاندا 757 ملن اقش دوللارىنا ۇلعايىپ، 2،4 ملرد اقش دوللارىن قۇرادى، دەپ حابارلايدى Almaty-akshamy.kz. قازاقپارات سايتىنا سىلتەمە جاساپ.
«الدىن الا باعالاۋ مەن قورىتىندى دەرەكتەر اراسىنداعى ايىرماشىلىق، ەڭ الدىمەن، 2021 جىلدىڭ ەكىنشى توقسانىنداعى تولەم بالانسى بويىنشا كاسىپورىنداردىڭ تۇپكىلىكتى ەسەپتەرىن الۋعا بايلانىستى. شەتەلدىك تىكەلەي ينۆەستورلاردىڭ كىرىسى الدىن الا باعالاۋمەن سالىستىرعاندا 893 ملن اقش دوللارىنا وسكەن كىرىستەر بالانسىندا ەڭ ۇلكەن وزگەرىس بولدى. الدىن الا باعالاۋدى جاريالاۋ كەزىندە قالىپتاسقان كورسەتكىشتەر 2021 جىلدىڭ ەكىنشى توقسانىندا شەتەلدىك ينۆەستورلار كىرىسىنىڭ ءوسۋىن باعالامادى»، - دەلىنگەن ۇب مالىمەتىندە. تاراتىلعان مالىمەتكە قاراعاندا، شەتەلدىك ينۆەستورلار كىرىسىنىڭ ءوسۋى نەگىزگى قۇرامداستار – ديۆيدەندتەر بويىنشا جانە قايتا ينۆەستيسيالانعان پايدا بويىنشا بايقالادى. مۇنداي كىرىستەردىڭ باسىم بولىگى مۇناي-گاز، وزگە دە تاۋ-كەن ءوندىرۋ، قارجى سەكتورلارىنا تيەسىلى.
«ساۋدا بالانسى بويىنشا الدىن الا باعالاۋعا قاتىستى وزگەرىستەر شامالى جانە ۋاكىلەتتى ورگانداردىڭ ساۋدا مەن رەسپوندەنتتەردىڭ ەسەبىن جاڭارتۋعا بايلانىستى»، - دەپ اتالىپ وتكەن حابارلامادا.