قارجى سالاسى جاندانۋدا
قازاقستاندا حالىقارالىق ينۆەستورلار اپتالىعى باستالدى، دەپ حابارلايدى Almaty-akshamy.kz. Qazaqtv.com سايتىنا سىلتەمە جاساپ.
ءتيىمدى ديۆيدەندتەر الۋ ءۇشىن جيناقتاردى قالاي جانە قايدا سالۋ كەرەك؟ بۇل ماسەلەنىڭ انىق-قانىعىن ۇعىنۋعا جەتەكشى الەمدىك جانە وتاندىق ساراپشىلار كومەكتەسەدى. ەلوردادا حالىقارالىق ينۆەستورلار اپتالىعى باستالدى. استانا حالىقارالىق قارجى ورتالىعىنىڭ ونلاين الاڭىندا جاھاندىق دەڭگەيدە تانىلعان 20-دان استام مامان وزدەرىنىڭ تاجىريبەلەرىمەن بولىسەتىن بولادى.
ولار قارجى قۇيۋدىڭ مۇمكىندىكتەرى، قۇرالدارى مەن تاۋەكەلدەرى، سونداي-اق وسى سالاداعى يننوۆاسيالار تۋرالى اڭگىمەلەيدى. بۇل جونىندە كوبىرەك بىلگىسى كەلەتىن كەز كەلگەن ادام حالىقارالىق ورتالىقتىڭ رەسمي سايتىندا تىركەلىپ قوسىلا الادى. وتكەن جىلى سالا ماماندارىنىڭ دارىستەرىن 3 000-نان استام ادام تىڭدادى.
بۇل جولى 17 ءىس-شارا جوسپارلانعان. ونىڭ ىشىندە ۆەبينارلار، الەۋمەتتىك جەلىلەردەگى تىكەلەي ەفيرلەر جانە پانەلدىك سەسسيالار بار.
«ءبىز بۇل ءىس-شارانى وسىمەن 4 جىل بويى باعالى قاعازدار جونىندەگى حالىقارالىق ۇيىمنىڭ قولداۋىمەن وتكىزىپ كەلەمىز. بۇل - قور نارىقتارىنىڭ بارلىق رەتتەۋشىلەرىن بىرىكتىرەتىن جاھاندىق ۇيىم. وسى اپتادا وتكەن جىلداعى تىڭ ۇردىستەر مەن ءىس-شارالاردى قايتا سارالايتىن بولامىز. ءبىرىنشىسى قارجىلىق ساۋاتتىلىق، جاھاندىق دەڭگەيدە ول ءالى دە تومەن قالىپ وتىر. حالىقارالىق ۇيىمدار ەرەسەك حالىقتىڭ جارتىسى وزدەرىنىڭ قارجىلىق ساۋاتتىلىعىن ءالى دە ارتتىرۋ كەرەك دەپ سانايدى»، - دەدى «استانا» حالىقارالىق قارجى ورتالىعى كوميتەتىنىڭ باس ديرەكتورى مۇحتار بوبەيەۆ.