اقيىق اقىن مۇقاعاليدىڭ تۋعانىنا بيىل – 90 جىل.
وسىعان وراي اقىننىڭ تۋعان جەرى قاراساز تورىندە مەرەيلى مەرەكە ءوتتى، دەپ حابارلايدى Almaty-akshamy.kz.
الماتىدان اتتانعان، التاي مەن اتىراۋدان اسىعا جەتكەن قاۋىمدى قارا ءسوزدىڭ كيەسى قونعان قاراساز قۇشاق جايىپ، اندەتە-ولەڭدەتە قارسى الدى. مەرەيتويدىڭ العاشقى كۇنىندە قوناقتار اقىن مۇراجايىمەن تانىستى. سونداي-اق، كوپشىلىك مۇقاعاليدىڭ تۋعان مەكەنىنەن سىر شەرتەر «قاراساز كوشەلەرى» ءفيلمىنىڭ كورسەتىلىمىنە جينالدى. ءتۇرتىپ قالساڭ، تاۋى مەن تاسى دا ولەڭ وقيتىن اۋىل ايرىقشا اتموسفەرا، بولەكشە قۋانىشقا بولەنە كەتتى.
«بىرەۋلەر «عاسىر اقىنى» دەپ جاتادى. ول عاسىر اقىنى ەمەس، ول – عالامنىڭ اقىنى. عاسىر اقىنى دەپ قالىپقا سالۋعا بولمايدى. وزىنە ءسوز قۇدىرەتىن قۇداي بەرە سالعان ەرەكشە تۇلعالار بولادى، سولاردىڭ اراسىندا مۇقاعالي ءبىر پايعامبارلىق قاسيەتى بار ەرەكشە، ەرەن تۇلعا»، – دەدى اقىن، ق ر جازۋشىلار وداعى باسقارما ءتوراعاسىنىڭ ورىنباسارى باقىت بەدەلحان.
مەرەيتويدىڭ ەكىنشى كۇنى «الاش جىرىنىڭ اقيىعى» اتتى عىلىمي-تاجىريبەلىك كونفەرەنسيادان باستالدى. حالىقارالىق دەڭگەيدەگى ءىس-شاراعا تۇركى ادەبي الەمىنىڭ وكىلدەرى قاتىسىپ، مۇقاعالي جىرىنىڭ 7 تىلگە اۋدارىلعانىن سۇيىنشىلەدى. سونداي-اق، تاۋەلسىزدىكتىڭ 30 جىلدىعى مەن ماقاتايەۆتىڭ 90 جىلدىعى تۇسپا-تۇس كەلگەن ۋاقىتتا ۇيىمداستىرىلعان بايقاۋدىڭ جەڭىمپازدارى دا قاراساز تورىندە ماراپاتتالدى.
«اكەمىزدى حالىقتىڭ ءوزى دارىپتەپ جاتىر. ۋاقىت ونىڭ پوەزياسىنىڭ ومىرشەڭدىگىن كورسەتتى. ونىڭ اۋلەتىنىڭ اتىنان ءبىز وتە ريزامىز»، – دەيدى اقىننىڭ ۇلى جۇلدىز ماقاتايەۆ.
90 جىلدىقتىڭ باستى جاڭالىعى – نارىنقول تورىندە بوي كوتەرگەن اقىن ەسكەرتكىشى. اۋدان ورتالىعىنداعى ەڭسەلى تاس ءمۇسىننىڭ اشىلۋىنا ق ر مەملەكەتتىك حاتشىسى قىرىمبەك كوشەربايەۆ پەن ق ر مادەنيەت جانە سپورت ءمينيسترى اقتوتى رايىمقۇلوۆا، سونداي-اق، الماتى وبلىسىنىڭ اكىمى اماندىق باتالوۆ ارنايى كەلدى. «وشپەس مۇرا، ولمەس ولەڭ قالدىرعان مۇقاعالي الىستاعان سايىن، جاقىنداي تۇسەدى»، – دەيدى اتقامىنەرلەر.
«ءحانتاڭىرىنىڭ ماڭگى مۇز باسىپ جاتقان كەۋدەسىنە كوكتەم ورناتقان اقىن مۇقاعاليدىڭ 90 جىلدىق مەرەيتويى ءوتىپ جاتىر. بارشاڭىزدى وسى مەرەيتويمەن قۇتتىقتايمىن. كىشكەنتاي كەزىمنەن مەن دە وسى مۇقاعالي ولەڭدەرىن جاستىعىمنىڭ استىنا قويىپ، جاتتاپ ءوستىم، سۋىنداپ ءوستىم. مەن ءۇشىن مۇقاعاليدان اسقان اقىن جوق بولاتىن»، – دەيدى اقىن، ق ر پارلامەنتى ءماجىلىسىنىڭ دەپۋتاتى ماقپال مىسا.