ۇلتتىق بانك جاڭا كوللەكسيالىق مونەتانى ساتىلىمعا شىعارادى

مونەتا ۇلتتىق بانكتىڭ ينتەرنەت-دۇكەنىندە ساتىلادى.

جاڭا كوللەكسيالىق مونەتانىڭ تارالىمى – 100 000 دانا، دەپ حابارلايدى Almaty-akshamy.kz

بيىل 3 مامىردان باستاپ ۇلتتىق بانك «سەمەي يادرولىق پوليگونىنىڭ جابىلعانىنا 30 جىل» كوللەكسيالىق مونەتاسىن ساتىلىمعا شىعارادى.

«2022 جىلعى 3 مامىردان باستاپ «ەستە قالاتىن وقيعالار مەن ءبىرتۋار ادامدار» مونەتالار سەرياسىنان Semei iadrolyq poligonynyń jabylǵanyna 30 jyl كوللەكسيالىق مونەتالارى ساتىلىمعا شىعارىلادى»، - دەپ جازىلعان ۇلتتىق بانك تاراتقان حابارلامادا.

جاڭا كوللەكسيالىق مونەتا ريەۆەرسىندە ەكى بولىكتەن تۇراتىن يادرولىق جارىلىس تۇرىندە بەينەلەر كورىنىس تاپقان. 

«سول جاق بولىگى يادرولىق سىناقتاردىڭ تاريحىن، ۇزىلگەن ءومىر مەن شىرعالاڭ تاعدىردى بەينەلەيتىن جارىقشاقتار تۇرىندە بەرىلگەن. وڭ جاعىنان – زارداپ شەككەن تابيعاتتى بىلدىرەتىن قۋراعان اعاشتىڭ   بەينەسىن كورۋگە بولادى. قۋراپ قالعان اعاش بۇتاعىنداعى جاسىل جاپىراقتىڭ بەينەسى – جاندانۋ مەن قىلاڭ بەرگەن ءۇمىتتىڭ بەلگىسى»، - دەپ جازىلعان حابارلامادا.

مونەتالار 925/1000 سىنامادا كۇمىستەن ەمال جاعۋ تەحنولوگياسىمەن دايىندالعان. 

«ماسساسى – 31،1 گرامم، proof دايىنداۋ ساپاسى بار، نومينالى 500 تەڭگەلىك، تارالىمى – 5000 دانا جانە نەيزيلبەر قوسپاسىنان ماسساسى 11،17 گرامم، uncirculated ساپاسىمەن، نومينالى 100 تەڭگەلىك، تارالىمى – 100 000 دانا»، - دەپ جازىلعان حابارلامادا.